Многумина веруваат дека јадењето доцна навечер неизбежно води кон дебелеење, но ново истражување покажува дека тоа не мора секогаш да биде така. Научниците посочуваат дека одредена намирница богата со протеини, доколку се консумира пред спиење, може позитивно да влијае врз метаболизмот, опоравувањето на мускулите и процесот на слабеење.
Во фокусот на истражувањето, објавено во научното списание „Nutrition“, се најде свежото посно сирење – намирница богата со протеини која, според истражувачите, може да има повеќе придобивки доколку се јаде навечер.
Истражувачите наведуваат дека мала количина посно сирење околу 30 минути пред легнување може да биде добар избор за организмот и претставува природна алтернатива на различните протеински напитоци кои често се користат пред спиење.
Професорот Мајкл Ормсби од Универзитетот на Флорида истакнува дека резултатите покажуваат оти целосните намирници можат да имаат сличен ефект како и протеинските додатоци.
„Ова откритие е важно бидејќи покажува дека природната храна може да биде еднакво ефикасна како протеинските додатоци и им нуди на луѓето повеќе можности за исхрана пред спиење“, посочува Ормсби.
Причината поради која посното сирење се смета за добар избор навечер е високата содржина на казеин – протеин кој бавно се разградува и постепено ослободува аминокиселини во организмот во текот на ноќта.
Аминокиселините имаат важна улога во обновувањето и изградбата на мускулите, како и во правилното функционирање на имунолошкиот систем.
Според авторите на истражувањето, токму поради бавното ослободување на протеините, посното сирење може да помогне во одржување на метаболизмот за време на одморот, подобрување на регенерацијата на мускулите и да биде дел од балансирана исхрана кај луѓето кои сакаат да намалат телесна тежина.
