Силен земјотрес со магнитуда од 7,1 степени ја погоди јужната јапонска префектура Кумамото, соопшти Јапонската метеоролошка агенција (JMA).
По потресот, властите издадоа предупредување за можен цунами со бранови високи до еден метар, а дополнителни предупредувања за вонредни земјотреси беа активирани за повеќе префектури на островот Кјушу, меѓу кои Нагасаки, Кагошима, Фукуока, Сага, Оита и Мијазаки.
Засега нема информации за сериозни последици во нуклеарните централи Сендаи и Генкаи. Од компанијата Kyushu Electric Power информираа дека не се забележани неправилности во нивното работење по земјотресот.
Поради потресот, железничкиот оператор JR Kyushu привремено ги прекина железничките линии, вклучително и брзите возови Шинкансен, додека трае проценката на состојбата на инфраструктурата и безбедноста на патниците.
На социјалните мрежи се појавија снимки од последиците од земјотресот, меѓу кои и оштетувања на делови од историскиот замок Кумамото.
Јапонија е една од најсеизмички активните земји во светот и се наоѓа во зоната позната како „Огнен прстен“ на Тихиот Океан. Во земјата се случуваат околу 20 проценти од светските земјотреси со магнитуда 6,0 или поголема.
…
