Македонските аеродроми бележат рекордни резултати во авио-сообраќајот, а политиките за привлекување нови авиокомпании и отворање нови авиолинии веќе даваат видливи ефекти, истакна вицепремиерот и министер за транспорт Александар Николоски во гостувањето во емисијата „Вести Плус“.
Тој нагласи дека Владата активно работи на субвенционирање на нови авиопревозници и проширување на мрежата на авиолинии, што резултира со значителен раст на бројот на патници и реализирани летови.
„Охридскиот аеродром во текот на еден месец опслужи 52.500 патници, што претставува раст од 41 процент во однос на истиот период минатата година. Дополнително, на 20 јули беа реализирани повеќе од 20 летови во еден ден, што е апсолутен рекорд за овој аеродром“, изјави Николоски.
Според него, и Меѓународниот аеродром Скопје остварил историски резултати во текот на јули, со 409.000 опслужени патници и вкупно 2.670 реализирани летови. Само на 20 јули биле реализирани 101 лет, што претставува нов дневен рекорд.
Со овие резултати, двата македонски аеродроми во текот на јули опслужиле повеќе од 460.000 патници.
Николоски оцени дека доколку продолжи сегашната динамика на раст, Македонија во блиска иднина би можела да достигне бројка од четири милиони патници на годишно ниво.
Тој истакна дека растот на авионскиот сообраќај значи и поголем број туристи и деловни посетители, што директно влијае врз развојот на туризмот и дополнително ја поттикнува домашната економија.
…
