Романија денеска започна со контролирано исклучување на вториот реактор во нуклеарната централа „Чернавода“, поради рекордно нискиот водостој на Дунав.
Првиот реактор беше исклучен уште кон крајот на јули, а сега поради дополнителниот пад на нивото и протокот на реката, од системот се исклучува и вториот реактор.
Од државната компанија „Нуклеарелектрика“ информираат дека исклучувањето се спроведува според пропишаните процедури за нуклеарна безбедност. Причината не е дефект на реакторите, туку недостигот на вода неопходна за системите за ладење и кондензација.
Двата реактора во „Чернавода“ имаат вкупна моќност од околу 1.400 мегавати и во нормални услови обезбедуваат приближно една петтина од електричната енергија во Романија. Со нивното исклучување, земјата привремено останува без производство на електрична енергија од својата единствена нуклеарна централа.
Романските власти во изминатите недели преземаа низа вонредни инженерски мерки за да обезбедат доволно вода за ладење на централата. Беа отстранувани подводни пречки, продлабочувано речното корито и преземени други интервенции за пренасочување на водата кон системот за ладење.
Сепак, мерките имаа само привремен ефект поради продолжувањето на сушниот период и падот на водостојот на Дунав.
За да го надомести недостигот од нуклеарно производство, Романија активираше и термоцентрала на лигнит со моќност од 330 мегавати, а дополнителна електрична енергија обезбедува преку хидроцентрали, ветерни електрани и увоз од соседните земји.
Проблемот со екстремно нискиот водостој не ја погодува само Романија. Слична состојба е регистрирана и во Унгарија, каде што ниското ниво на Дунав создава проблеми за нуклеарната централа „Пакш“, поради што се преземаат итни мерки за обезбедување доволно вода за ладење.
Екстремната суша така повторно го отвора прашањето за влијанието на климатските промени и долгите сушни периоди врз стабилноста на енергетските системи зависни од речните води.
…
