Здравствените власти апелираат до граѓаните да пријават доколку забележат мртва дива птица, особено гавран, поради засилените мерки за следење на можните резервоари на вирусот на западнонилска треска.
Министерот за здравство Сашо Клековски повика сите пронајдени мртви диви птици да бидат пријавени во Агенцијата за храна и ветеринарство, со цел да се овозможи навремена контрола и лабораториско испитување.
„Најчести резервоари на западнонилска треска се гавраните. Имаме апел за пасивно пријавување, односно сите граѓани кои ќе најдат мртва дива птица, гавран или која било друга птица, да ја пријават во Агенцијата за храна“, изјави Клековски.
Досега е пријавен еден случај на мртва птица во Гостивар, но кај неа не е детектиран вирусот на западнонилска треска.
Во ризичните подрачја ќе биде засилена и контролата на живината, особено на живината која слободно се движи во близина на каналите за наводнување.
Клековски потсети дека при последното поголемо појавување на западнонилска треска во 2019 година, од девет контролирани кокошки била утврдена една заразена, и тоа во едно од подрачјата кои и сега се сметаат за ризични.
Во земјава во моментов се потврдени 35 случаи на западнонилска треска, додека три случаи се суспектни и се во процес на дијагностицирање. Шест пациенти се во критична состојба и се лекуваат на интензивна нега на Клиниката за инфективни болести.
Сите хоспитализирани пациенти се лица постари од 60 години. Во саботата беше регистриран и третиот смртен случај од западнонилска треска во Македонија.
