Грчки фармери добивале европски субвенции за „невидливи“ крави: бројките не се совпаѓаат со официјалните податоци
Нов скандал со европските земјоделски субвенции ја потресува Грција, откако анализа на официјалните податоци открила големи разлики меѓу бројот на животни за кои биле исплаќани субвенции и реалниот број на добиток евидентиран во земјата.
Како што пишува Политико, грчките фармери во 2024 година пријавиле десетици илјади животни повеќе од оние што може да се потврдат преку официјалните национални статистики. Најголеми несогласувања се забележани кај говедата, но сличен проблем постои и кај овците и козите.
Податоците на грчкото Министерство за земјоделство покажуваат дека во 2024 година биле исплатени европски субвенции за околу 260.000 крави во лактација. Во истата година биле заклани околу 70.000 говеда.
Проблемот е што официјалните статистики покажуваат сосема поинаква слика. Според грчкиот статистички институт ELSTAT, бројот на говеда во земјата се намалил од околу 640.000 во 2023 година на 600.000 во 2024 година, а во 2025 година паднал на околу 520.000 животни.
Ако се земат предвид околу 260.000 крави во лактација, нивното природно размножување и бројот на заклани животни, бројките би требало да укажуваат на зголемување, а не на намалување на вкупното стадо.
Се разговарало и со грчки сточари, според кои секоја година околу 20 отсто од добитокот се отстранува поради старост, намалена продуктивност или болести. Но, дури и со оваа ставка, податоците и понатаму оставаат значителна разлика меѓу бројот на животни пријавени за субвенции и официјално евидентираниот број.
Уште поголеми разлики се појавуваат кај овците и козите. Додека ELSTAT за 2025 година евидентирал околу 8,8 милиони животни, во владиниот Интегриран ветеринарен информациски систем биле регистрирани околу 15,7 милиони – разлика од речиси седум милиони животни.
Случајот дополнително го отвора прашањето за контролата на европските земјоделски фондови во Грција. Во земјата веќе се водат истраги поврзани со наводни злоупотреби на субвенциите, меѓу кои и пријавување пасишта кои апликантите не ги поседувале или не ги користеле.
Европското јавно обвинителство (EPPO) веќе постапува по повеќе случаи поврзани со грчките земјоделски субвенции. Во еден документ доставен до грчкиот парламент се наведуваат и наводи дека ветеринари и службеници на OPEKEPE, институцијата која претходно била задолжена за распределба на европските земјоделски средства, учествувале во манипулирање со податоците за добитокот.
Сè уште нема потврда дека конкретните разлики меѓу статистичките податоци и податоците за субвенциите се резултат на измама. Но, откриените несогласувања отвораат сериозни прашања за точноста на регистрите и контролата на милијардите евра европски средства наменети за грчкото земјоделство.
