Крајот на продолжениот викенд и враќањето на голем број македонски граѓани од Грција пред почетокот на новата учебна година предизвикаа огромни колони на граничните премини.
Најкритична е состојбата на преминот Евзони–Богородица, во правец од Грција кон Македонија, каде според информации од патници на терен, колоната на возила се протега со километри, а за преминување на границата се чека и повеќе од два и пол часа.
Дел од патниците сведочат дека застојот започнува уште во близина на последната патарина пред Евзони.
„Ја поминавме патарината пред границата и застанавме. Редицата кон Евзони е огромна и не знаеме колку време ќе чекаме“, раскажуваат граѓани кои се враќаат од летување во Грција.
Голема фреквенција има и на граничниот премин Дојран, каде во правец кон Македонија исто така се формирани долги колони, а според информации од патници, задржувањето во одредени периоди надминува два часа.
Во спротивната насока, од Македонија кон Грција, сообраќајот се одвива значително побрзо.
Зголемен интензитет на возила има и на патиштата низ Македонија. Поголеми гужви се забележуваат на наплатните станици, како и на патниот правец Охрид–Скопје, особено на приодот кон Гостивар.
Од АМСМ информираат дека денеска интензитетот на сообраќајот на патните правци надвор од градските средини е зголемен.
Причина за големиот бран возила е масовното враќање на граѓаните од летните одмори и продолжениот викенд, непосредно пред почетокот на новата учебна година.
