Инфлацијата во Албанија во август достигна 3,2 отсто на годишно ниво, што претставува зголемување во однос на 2,3 отсто, колку што изнесувала во истиот период минатата година. Во споредба со јули, потрошувачките цени се зголемиле за 0,1 отсто.
Според податоците на Институтот за статистика на Албанија (ИНСТАТ), најголем придонес кон годишната инфлација имаат цените на храната и безалкохолните пијалаци, транспортот и трошоците поврзани со домувањето и енергијата.
Групата „храна и безалкохолни пијалаци“ придонела со 0,95 процентни поени кон вкупната инфлација, транспортот со 0,79 процентни поени, а „кирија, вода, електрична енергија, гас и други горива“ со 0,76 процентни поени.
Најзначителен годишен раст на цените е регистриран кај транспортот, каде што цените се зголемиле за 12 отсто. Следуваат „забава, спорт и култура“ со раст од 5,4 отсто и „осигурување и финансиски услуги“ со 4,6 отсто.
Трошоците за кирија, вода, електрична енергија, гас и други горива се зголемиле за 3,7 отсто, додека храната и безалкохолните пијалаци, како и мебелот, апаратите за домаќинство и одржувањето на домот, поскапеле за 2,8 отсто.
Наспроти овие движења, годишно намалување на цените е забележано кај облеката и обувките, кои поевтиниле за 3,2 отсто, како и кај услугите поврзани со информации и комуникации, со пад од 1 отсто.
На месечно ниво, во август најголем раст на цените е регистриран кај транспортот – 3,9 отсто. Цените во рестораните и услугите за сместување се зголемиле за 0,2 отсто, додека трошоците за кирија, вода, електрична енергија, гас и други горива пораснале за 0,1 отсто.
Од друга страна, облеката и обувките поевтиниле за 1,1 отсто, храната и безалкохолните пијалаци за 0,4 отсто, а алкохолните пијалаци и тутунот за 0,3 отсто. Цените на мебелот, апаратите за домаќинство и услугите за одржување на домот се намалиле за 0,1 отсто.
Податоците на ИНСТАТ покажуваат дека транспортот, храната и трошоците за домување и енергија остануваат меѓу клучните ставки што влијаат врз движењето на потрошувачките цени во Албанија.
..
