Необична роденденска традиција од Данска повторно го привлече вниманието на социјалните мрежи. Според обичајот, луѓето кои го прославуваат 25. роденден, а сè уште не стапиле во брак, пријателите и семејството ги посипуваат со големо количество цимет.
На снимките што кружат на интернет може да се види како славеникот е врзан за столб, по што присутните го полеваат со вода и го покриваат со цимет од глава до пети. Водата се користи за зачинот полесно да се залепи, а во некои верзии од обичајот се употребуваат и јајца.
Иако ритуалот изгледа сурово, во Данска се смета за шеговит начин на одбележување на роденденот, а не за осуда на лицата кои не се во брак. Данската туристичка организација ја наведува оваа практика меѓу необичните традиции во земјата.
ВИДЕОТО МОЖЕ ДА ГО ПОГЛЕДНЕТЕ ТУКА
Корените на обичајот се поврзуваат со старите трговци со зачини, кои поради честите патувања неретко останувале неженети. Неоженетите мажи биле нарекувани „пеберсвенд“, односно „момци со бибер“, додека за немажените жени се употребувал изразот „пебермо“.
Се смета дека традицијата со бибер е постара и потекнува од времето кога трговијата со зачини имала значајна улога во данската економија. Посипувањето со цимет на 25. роденден најверојатно се појавило подоцна како поблага верзија на истиот обичај.
Доколку славеникот и на 30 години не е во брак, традицијата добива продолжение – циметот се заменува со бибер. Во некои случаи лицето повторно се посипува, додека во други пред неговиот дом се поставува голема декоративна мелница за бибер или му се подарува сет за сол и бибер.
Обичајот денес главно претставува повод за дружење и забава. Тој не значи дека Данците очекуваат младите да стапат во брак пред 25. година – просечната возраст за прв брак во земјата е значително повисока и изнесува околу 35 години за мажите и над 32 години за жените.
