На местото на поранешните рудници за лигнит во близина на Кожани, во северна Грција, се планира изградба на еден од најголемите центри за податоци во Европа.
Проектот го подготвува грчката национална електроенергетска компанија ДЕИ, а вкупната инвестиција се проценува на околу 5,8 милијарди евра. Планот е просторот кој со децении бил поврзан со ископување лигнит постепено да се трансформира во модерен технолошки центар, паралелно со развојот на производство на чиста енергија.
Според плановите, првата фаза ќе опфати дата центар со капацитет од 300 мегавати, кој треба да биде изграден до крајот на 2028 година. До 2031 година капацитетот би можел да биде зголемен на еден гигават.
ДЕИ веќе разговара со големи меѓународни компании од областа на облачните и дигиталните услуги, познати како „хиперскалери“, кои би можеле да го користат идниот центар за податоци.
Проектот е дел од пошироката трансформација на регионот Кожани, кој е еден од областите во Грција најсилно погодени од постепеното напуштање на лигнитот. Грчката влада во 2019 година најави прекин на производството на електрична енергија од лигнит, а последната оперативна електрана во регионот, Птолемаис 5, треба да престане да користи лигнит до крајот на оваа година.
Локалните жители, сепак, укажуваат дека економската транзиција досега не создала доволно нови работни места за да ги ублажи последиците од затворањето на рудниците и намалувањето на производството од јаглен.
Грчкиот премиер Киријакос Мицотакис при неодамнешната посета на регионот најави дека трансформацијата треба да донесе нови и подобро платени работни места. Владата планира за развојот на регионот да се користат и европски средства.
Покрај дата центарот, во областа се планираат и дополнителни проекти за производство на зелена енергија, со што поранешниот јагленов регион би требало постепено да се претвори во енергетски и технолошки центар.
…
