ТАВ Македонија ја повлече мерката со која бесплатниот пристап на едно возило до зоната „Hug & Fly“ на Меѓународниот аеродром Скопје беше ограничен на еден влез во период од 24 часа.
Одлуката следува откако Комисијата за одлучување по прекршок при Комисијата за заштита на конкуренцијата побара дополнителни појаснувања и релевантни податоци од ТАВ Македонија во врска со условите и режимот за користење на зоната.
По доставеното барање, од ТАВ Македонија ја информирале Комисијата дека ограничувањето е повлечено, со што повторно не важи правилото според кое едно возило можеше бесплатно да влезе само еднаш во текот на 24 часа.
Од Комисијата ја поздравија одлуката и најавија дека ќе продолжат да ја следат состојбата и условите за пристап до аеродромската инфраструктура.
Особено внимание, како што посочуваат, ќе биде посветено на обезбедувањето еднакви и недискриминаторски услови за сите учесници на пазарот.
Комисијата додава дека останува посветена на заштитата на конкуренцијата и ќе постапува во рамки на своите законски надлежности секогаш кога постои можност одредени услови или мерки да влијаат врз конкуренцијата и интересите на граѓаните.
