Дрон падна во близина на градот Солка, во округот Сучеава, Романија, откако претходно влегол во романскиот воздушен простор, соопшти романското Министерство за национална одбрана.
Инцидентот се случил рано утрово, на 24 септември. Радарскиот систем на романското Министерство за одбрана првично регистрирал воздушна цел на украинска територија, во близина на границата со Романија, во северниот дел на округот Ботошани. Според радарските податоци, целта потоа влегла во романскиот воздушен простор.
Два романски борбени авиони Ф-16 полетале од воздухопловната база Бoрча за да ја следат ситуацијата. На населението во окрузите Ботошани и Сучеава му било испратено предупредување преку системот RO-Alert.
Според дополнителното соопштение на Министерството, воздушната цел се движела околу четири минути во романскиот воздушен простор, по што се урнала во близина на Солка.
Екипите на Министерството за внатрешни работи го обезбедиле местото и идентификувале мал дрон, а на местото на падот немало пожар. Во инцидентот нема жртви ниту материјална штета. Подоцна во областа бил испратен и хеликоптер IAR-330 SOCAT за дополнително набљудување.
Романските власти засега не соопштија дека дронот бил руски или дека станува збор за „самоубиствен дрон“. Потеклото и точниот тип на леталото се предмет на дополнителна истрага.
…
