Србија следната недела ќе ги постави првите цевки од гасниот интерконектор кон Македонија, со што проектот влегува во конкретна фаза на изградба.
Поставувањето ќе започне на делница долга околу пет километри во близина на Врањска Бања. До крајот на октомври се очекува да бидат испорачани цевки за околу 15 километри од трасата.
Српската министерка за рударство и енергетика во технички мандат Дубравка Ѓедовиќ Хандановиќ соопшти дека трасата на интерконекторот на територијата на Србија ќе биде долга околу 145 километри.
Вредноста на српскиот дел од проектот се проценува на околу 153 милиони евра, додека планираниот капацитет на гасната врска е до 1,5 милијарди кубни метри природен гас годишно.
Српските власти очекуваат работите на нивна територија да бидат завршени во првиот квартал од 2028 година. Од македонска страна, завршувањето на делницата се очекува до средината или до крајот на 2028 година.
Гасниот интерконектор со Србија ќе биде поврзан со новата гасна врска меѓу Македонија и Грција, која веќе се гради. Со тоа Македонија треба да добие дополнителни можности за снабдување со природен гас преку грчките терминали за течен природен гас, меѓу кои Ревитуса и Александруполис.
Новата инфраструктура ќе овозможи гасот од јужните правци преку Македонија да продолжува кон Србија и понатаму кон пазарите во Централна Европа, создавајќи дополнителна рута за снабдување на регионот.
Македонија и Србија се дел и од Вертикалниот гасен коридор, преку кој се поврзуваат гасните системи на земјите од Југоисточна и Централна Европа.
Интерконекторот Србија–Македонија е дел од пошироките регионални проекти за диверзификација на изворите и правците за снабдување со природен гас и зајакнување на енергетската сигурност.
…
