Со свечена академија, положување цвеќе и доделување на државната награда „23 Октомври“, денеска се одбележува Денот на македонската револуционерна борба.
Празникот е посветен на основањето на Македонската револуционерна организација во Солун во 1893 година и на борбата за слобода и автономија на Македонија.
По повод одбележувањето, во Македонскиот народен театар ќе се одржи свечена академија насловена „Свои на своето!“, на која е најавено обраќање на премиерот Христијан Мицкоски.
Собраниска делегација предводена од потпретседателот Антонијо Милошоски, во состав со пратеничките Велика Стојкова-Серафимовска и Даниела Николова, ќе положи венец свежо цвеќе пред Споменикот на основачите на ВМРО во паркот „Жена борец“ во Скопје.
Во Кристалната сала на Собранието, во 11 часот, е предвидено доделувањето на државната награда „23 Октомври“ за 2026 година.
Добитник за остварувања во културата и уметноста е актерот Ѓорѓи Јолевски. Во областа на науката, наградата им се доделува на историчарот проф. д-р Стојко Стојков и на археологот проф. д-р Виктор Лилчиќ Адамс.
Организацијата ја основале Христо Татарчев, Даме Груев, Петар Поп Арсов, Иван Хаџи Николов, Антон Димитров и Христо Батанџиев. Нејзината дејност се развивала преку создавање мрежа од комитети и организирање на револуционерното движење, чиј значаен настан е Илинденското востание во 1903 година.
Празникот беше одбележан и во македонскиот Културно-информативен центар во Софија. Во средата вечер таму се одржа настан посветен на револуционерното движење, идеалите за слобода и достоинство и животот и делото на Даме Груев.
…
