ВЛЕН ги претстави како резултати од своето владеење одлуките и активностите во изминатата недела, меѓу кои решението за професионалните војници по навршувањето 45 години, набавката на нови амбулантни возила, поддршката за земјоделците и инвестициите во образованието и заштитата од поплави.
Од партијата соопштија дека Владата одобрила можност професионалните војници по 45-годишна возраст да продолжат да работат во Армијата како цивилен персонал до пензионирањето. Според ВЛЕН, решението треба да им обезбеди поголема сигурност на војниците и нивните семејства.
Во здравството се предвидени 100 нови амбулантни возила, со инвестиција од 460 милиони денари. Возилата ќе бидат опремени со современа опрема за интервенција и третман на пациентите за време на транспортот. Од ВЛЕН наведуваат дека придобивките ќе ги почувствуваат граѓаните од Липково до Струга.
За заштита од поплави во Сарај се издвоени повеќе од 379 милиони денари. Министерството предводено од Мухамед Хоџа финансира уредување на околу 12 километри од коритото на Сува Река. Според податоците на партијата, за помалку од три месеци се завршени 20 проценти од работите. Проектот треба да ги заштити домовите, имотите и земјоделските површини на жителите.
ВЛЕН соопшти и дека универзитетската библиотека „Кочо Рацин“ во Тетово за првпат добива универзитетски статус. Одлуката била донесена на предлог на министерот Седат Сулејмани, а библиотеката треба да ги прошири услугите за студентите, професорите и истражувачите.
На сметките на 1.934 производители на јаболка, според партијата, се исплатени околу 149,5 милиони денари за предаденото производство. ВЛЕН ја посочува исплатата на обврските и поддршката за домашното производство како дел од ангажманот на заменик-министерот Албрим Хоџа.
Заменик-министерот Дритон Сулејмани ги посетил Норово, Алданци и Врбовец во Крушево, каде што разговарал за состојбата на училиштата во населените места со албанско население. Во Норово, постапките за урбанизација се пред завршување, што треба да овозможи продолжување на работите за изградба на ново училиште, соопшти ВЛЕН.
Партијата го посочи и решавањето на долгогодишното прашање поврзано со изучувањето на правните науки на албански јазик. Според ВЛЕН, по предлог на министерот Јетон Шашивари, прашањето што било нерешено 35 години сега се придвижува кон решение.
„ВЛЕН е на терен и работи“, порачуваат од партијата.
…
