Хрватска, која е работна дестинација и за многу Македонци, до 2035 година би можела да се соочи со недостиг од околу 327.000 работници. Проценката на Светската банка го поврзува очекуваниот недостиг со стареењето на населението, намалувањето на бројот на работоспособни граѓани и зголемените потреби на економијата.
Според проекцијата што ја пренесува порталот „Пословни“, понудата на работна сила во земјата би се намалила за околу 291.000 луѓе. Истовремено, побарувачката би се зголемила за дополнителни 36.000 работници, создавајќи вкупен јаз од 327.000 лица.
Тоа значи дека проектираниот недостиг не произлегува само од отворањето нови работни места, туку во најголем дел од намалувањето на достапната работна сила.
Продолжување на растот на вработеноста предвидува и Деловната стратегија на Хрватската служба за вработување до 2030 година. Под претпоставка дека економијата ќе расте со стапка од 2,5 проценти годишно, бројот на вработени би се зголемил од околу 1,73 милиони во 2025 година на приближно 1,84 милиони во 2030 година.
Во истиот период, бројот на невработени се очекува да се намали од околу 80.000 на помалку од 60.000 лица.
Потребата од странски работници во Хрватска веќе расте, особено во градежништвото, туризмот, транспортот, индустријата и услужните дејности.
Проекциите укажуваат дека обезбедувањето доволно работници ќе остане значаен предизвик за хрватската економија. Сепак, бројката од 327.000 претставува проценет недостиг до 2035 година, а не број на моментално отворени работни места или најавени дозволи за странски работници.
…
