Продолжуваат обвинувањата на релација Влада – и дел од судската и обвинителска фела. Премиерот Мицкоски денеска повторно со критики за државниот обвинител Љупчо Коцевски – му дадовме шанса, но добивме стотици истраги и процеси кои се опструираат од обвинители. Изјавата на премиерот доаѓа откако вчера Коцевски рече дека обвинувањата кон Обвинителството се неосновани. Мицкоски од понеделник најави и робусна акција во која судии и обвинители ќе треба да сносат одговорност за своите противзаконити дејствија. 

Градоначалникот на општина Битола, Тони Коњановски, вечерва е на терен заедно со екипите на зимската служба кои активно работат на расчистување на снегот од патиштата во повисоките села на општината.

„Во моментот зимската служба ќе пристапи кон чистење на селата кои се наоѓаат на повисоките места во Битола. Екипите ќе бидат цела вечер на терен,“ изјави Коњановски.

Со оглед на обилните врнежи од снег, локалната самоуправа ја активираше зимската служба со цел да обезбеди пристапност до сите населени места, особено до оние кои се соочуваат со потешкотии поради неповолните временски услови.

Градоначалникот потенцира дека општината е подготвена да се справи со снежните услови, а службите остануваат во состојба на постојана мобилност додека трае потребата.

Жителите на повисоките села во Битола ги поздравија напорите на екипите и локалната власт за брзата реакција и ангажманот за одржување на проодноста на патиштата.

Успорен или никаков развој, губење на странски деловни партнери, инвестиции и пазари, отежнат транспорт, работење со загуби. Многу од компаниите кои сме сместени во срцето на Пелагонија, децениското отсуството на адекватна патна инфраструктура, со години го плаќаме прескапо, констатира градежниот стопанственик од Прилеп, Гордан Бошкоски. Оттука, конечната изградба на автопатиштата од Градско, па се’ до грчката граница, ќе значи и своевиден препород за целокупниот бизнис во овој регион, вели тој.

„Пелагонискиот регион беше буквално „слепо црево“ за инвеститорите. Сме имале случаи кога одредени добавувачи кои ги носат од странски компании, да ни речат – „јас немам на полош пат поминато со шлепер во поширокиот дел на Европа“…Кога ќе имате автопат, кога ќе имате таква работа, тогаш дефинитивно, ќе доаѓаат и странски компании како инвеститори заради тоа што е многу лесно поврзувањето со пристаништето во Солун…Значи, тука е крвотокот на бизнисот. Без современи патишта нема развој на економијата, дефинитивно е тоа“, – дециден е Гордан Бошкоски, градежен стопанственик од Прилеп.

  Од друга страна, Пелагонискиот регион, со години е и втор по големина во придонесот на формирањето на БДП во Македонија со скоро 12 насто, а во исто време пак, е со најмал процент на застапеност на „сивата“ економија. Ова, според Бошкоски е и причина повеќе, оваа Влада посериозно да се посвети на развојот на овој регион, бидејќи, како што вели, негативните рефлексии и врз тековното работење, и врз реалниот развој, сега им се огромни.

  „Фирмите и компаниите кои што работат во овој регион, транспарентно си ја обавуваат работата. Работат законски и.т.н., додека тоа не е случај со некои делови од Македонија…Компании кои што се јавуваат, а се подложни да работат и буквално „на црно“, ни претставуваат нелојална конкуренција“, – категоричен е Бошкоски.

   Инвестицискиот „бум“ во овој дел од земјата, особено во патната инфраструктура, неодамна го најави и ресорниот министер и вице-премиер, Александар Николоски. Тој рече дека до Нова година ќе биде пуштена првата делница до Дреново од Експресниот пат Градско –Прилеп, до март – Дреново-Фариш, а за три години да биде готов и автопатот Прилеп-Битола. А тука е и изградбата на битолската Обиколница, како и на Експресен пат до Граничниот премин „Меџитлија“.