Станицата ОФФ од Краков соопшти дека „ова е прв експеримент во Полска со новинари кои се виртуелни ликови кои ги создаде вештачка интелигенција“.

Радиото соопшти дека креирале три аватари кои се така дизајнирани за со прилозите за културата, уметноста и општествените прашања, вклучувајќи ги проблемите на ЛГБТ заедницата, да допрат до младите слушатели, пренесува Асошиејтед прес.

„Дали вештачката интелигенција е повеќе прилика или закана за медиумите, радиото и новинарството? Ќе бараме одговори на тоа прашање“, кажа директорот на радиото Марќин Пулит.

Оваа промена предизвикала внимание во цела Полска откако новинарот и филмски критичар Матеуш Демски, кој до неодамна водел емисија на тоа радио, во отворено писмо изразил протест „поради замената на вработените со вештачка интелигенција“.

„Тоа е опасен преседан кој нè погодува сите“, напиша Демски, додавајќи дека тоа би можело да отвори врата „на свет во кој искусните вработени кои со години биле поврзани со медиумскиот сектор и луѓето вработени во креативната индустрија би можеле а бидат заменети со машини“.

Демски за АП кажа дека петицијата која ја иницирал до вчера наутро ја потпишале повеќе од 15.000 луѓе. Кажал дека примил повици од стотина луѓе, меѓу кои млади, кои не сакаат да бидат заморчиња во таков експеримент.

Демски работел во радиото ОФФ од февруари 2022 година, водејќи разговори со избегани Украинци, до август, кога бил отпуштен со уште десетина новинари. Кажал дека му е особено шокантно бидејќи радио-станицата делумно се финансира од парите на даночните обврзници.

Директорот Пулит, пак, тврди дека отпуштањето следело бидејќи слушаноста била „речиси нула“.

Министерот за дигитализација и заменик премиер Кжиштоф Гавковски изјави дека го прочитал писмото на Демски и дека е потребна законска рамка со која ќе се регулира вештачката интелигенција.

„Иако сум поддржувач на развојот на вештачката интелигенција, мислам дека сè повеќе и повеќе се преминуваат некои граници“, порача полскиот министер на платформата Икс.

„Широката примена на вештачката интелигенција мора да оди во корист на луѓето, а не против нив“, додаде Гавковски.

Унгарија планира речиси четирикратно да го зголеми данокот на краткорочниот наем на станови во Будимпешта за да се избори со станбената криза во својата престолнина.

Според нацрт законот, месечниот данок на краткорочниот наем на станови ќе изнесува до 150.000 форинти, односно околу 373 евра, што претставува значителен пораст во однос на досегашните 38.400 форинти, пренесува Блумберг.

Покрај тоа, унгарската влада нема да издава нови дозволи за краткорочен наем на станбени единици во Будимпешта во 2025 и 2026 година, се наведува во нацрт законот.

Жителите на шестиот градски округ на Будимпешта, една од најпопуларните туристички дестинации, минатиот месец ја подржаа целосната забрана на краткорочниот наем почнувајќи од 2026.

Тие со години се жалат на бучавата, големото количество ѓубре и поскапувањето на кириите поради растот на туризмот.

Трошоците за живеење во Будимпешта во изминатите десет години пораснале за речиси четири пати, делумно и поради развојот на платформите за изнајмување како Букинг и Ербиенби.

Германија планира да го реши недостигот на квалификувана работна сила со масовно ангажирање работници од Индија, објави оваа недела во Берлин германскиот министер за труд Хубертус Хајл.

За таа цел, рече тој, компанијата ќе преземе повеќе од 30 мерки за отстранување на бирократските пречки во однос на издавањето дозволи.

Хејл предупреди дека Германија се соочува со сериозен недостиг на работна сила, а овие тесни грла го кочат растот и напредокот на земјата. Министерот стравува дека ситуацијата ќе се влоши со стареењето на општеството без имиграција, објави германската новинска агенција dpa.

– Во Индија ситуацијата е токму спротивна – рече тој и објасни дека тамошниот пазар на труд тешко ги апсорбира дури и високообразованите луѓе. Според него, милион луѓе се приклучуваат на пазарот на труд во Индија секој месец, па индиските власти ја поттикнуваат миграцијата.

– Во оваа светлина, Германија ја гледа Индија како особено важен партнер – нагласи Хејл.

Како што најави, германското Министерство за надворешни работи до крајот на годинава ќе го дигитализира издавањето визи за Индија, а нешто подоцна и за другите земји. Со ова сакаат да го забрзаат вработувањето на странци во Германија.

Планираат и поширока промоција на германскиот јазик, а воедно и подобра помош за Индијците кои веќе се во Германија да најдат работа.

Според Хејл, Германија ќе ја претстави својата индиска стратегија за вработување за време на посетата на германските претставници на Индија следната недела.