Во неделата, во Дом на култура „Иљо Антески – Смок“ во Тетово се одржа значаен концерт на културното уметничко друштво „Извор“ од с. Јегуновце, кое по 19-ти пат од своето основање ја прослави својата традиција и работа со годишен концерт. „Извор“ , претходно познат како „Југохром“ чии почетоци се далечната 1974 година, постои од 2005 г. и наредната година се спрема за голем јубилеен концерт по повод 20 години постоење, промоција на македонската фолклорна култура, како и реафирмација на полошкиот регион со негување на локални песни и игри.

На концертот се собраа многу обожаватели, пријатели и љубители на фолклорната музика, кои уживаа во богатата програма составена од традиционални песни и игри. Играорците на КУД „Извор“ се претставија со: „Моме Митро“, „Пијанец“, „Водарки“, како и „Посеље“ – оро кое го носи името на пределот во кое друштвото функционира и игрите кои потекнуваат од тој простор. Покрај домаќините, гости беа КУД „Кирил Пејчиновиќ“ од с. Теарце и двајца вокални изведувачи од Фолклорното студио „Блажевски“ од Скопје.

Културното уметничко друштво „Извор“ покрај настапите на македонско тло, има настапувано во неколку европски земји, меѓу кои: Полска, Унгарија, Словенија, Турција, Бугарија, Србија, Хрватска, Црна Гора и др. Токму ова лето, младинскиот ансамбл беше гостин на меѓународен фестивал во Мохач, Република Унгарија. Раководител е истакнатиот кореограф и уметнички раководител на играораниот кор во НУ „Танец“, Јовица Блажевски, кој е во „Извор“ уште од неговите почетоци, додека претседател е Ненад Блажески, локален стопанственик.

По повод овој годишен концерт, претставниците на друштвото изразија благодарност до сите поддржувачи и покровители, нагласувајќи дека нивната поддршка е клучна за одржување на духот на фолклорната традиција. Организацијата истакна дека претстои јубилејна година во која „Извор“ сака да ги изненади гостите со преубава и несекојдневна програма по повод дваесетгодишниот јубилеј. Групата продолжува да работи на нови проекти и да се бори за зачувување на македонската фолклорна традиција за идните генерации. Фолклорот е важен симбол на полошките предели, што несомнено „Извор“ го докажува со текот на времето.