Цените на нафтата паднаа до 71 долар на меѓународните пазари во средата, бидејќи стравувањата за побарувачката преовладаа кај инвеститорите, при што главните производители ги намалија прогнозите и знаците за забавување на економијата во Кина.

На лондонскиот пазар цената на барелот во попладневното тргување беше пониска за 65 центи во однос на затворањето на пазарот во вторникот и изнесуваше 71,24 долари. На американскиот пазар, пак, со барелот се тргуваше по 54 центи пониска цена, по 67,58 долари.

Одделно, Организацијата на земјите извознички на нафта (OPEC), објави дека барелoт од референтната нафтена кошничка на нејзините членки во вторникот поевтинил за 1,41 долари на 71,51 долари.

На крајот од минатата седмица и првата половина од оваа, индициите за послаба кинеска побарувачка и новите проценки на OPEC за оваа и следната година го одбележаа расположението на пазарите. Во вторникот, нафтениот картел повторно ја намали проценката за растот на побарувачката во 2024 година, од 2,03 милиони на 1,93 милиони барели дневно. Во 2025 година, според новите проценки, треба да се зголеми за 1,74 милиони барели дневно, 100 илјади барели пониско од она што беше пресметано во октомври.

Групацијата повторно ја издвои очекуваната послаба побарувачка во Кина поради забавувањето на економската активност, особено во градежниот сектор и преминот кон почисти енергенси. Во такви услови кинеската побарувачка годинава би требало да се зголеми за 450 илјади барели дневно, приближно 100 илјади барели пониско од претходните пресметки на OPEC.

Истовремено, инвеститорите беа разочарани што Пекинг, наместо директни стимулации за економијата, одлучи да го ограничи огромниот долг на локалната власт.

Тежиште на цените е зајакнувањето на доларот по победата на Доналд Трамп на претседателските избори во САД бидејќи ја спречува побарувачката од купувачите на други валути.

Инвеститорите, исто така, се обидуваат да откријат како составот на кабинетот на Трамп може да влијае на понудата и побарувачката. Ново-стариот американски претседател се подготвува на функцијата државен секретар да го назначи сенаторот Марко Рубио, познат по неговите „воинствени“ ставови кон Иран, Кина и Куба.

„Назначувањето на Рубио може да ги подигне цените на нафтата, бидејќи неговиот цврст став кон Иран може да резултира со нови санкции и потенцијално да ја намали глобалната понуда за 1,3 милиони барели дневно“, пишува Ешли Келти од „Panmurа Liberum“.

Иранскиот министер за нафта порача дека Техеран подготвил план за зачувување на производството и извозот на нафта и дека се подготвени за можни нови американски ограничувања, според веб-страницата на министерството.

Пазарната вредност на акциите кои фирмите на Чифлиганец и на Азманов ги поседуваат во НЛБ Банка надминува 6,2 милиони евра. Толкави се нивните вложувања во акции на НЛБ Банка за кои познавачите велат дека течат од оваа пролет до сега…

Градежната компанија „Адора Инжинеринг“ на Ванчо Чифлиганец и „Настел“ на Зоран Азманов станаа втор и трет најголем акционер во НЛБ Банка една од трите најголеми деловни банки во Македонија.

Во извесен актуелен временски период и двајцата градежни магови купувале акции со право на глас во НЛБ Банка.

Според актуелна состојба на акционери во НЛБ „Адора Инжинеринг“ сега поседува над 5.100 акции. Нивната актуелна пазарна цена е над 3,8 милиони евра. Оваа количина акции во вкупната структура акции учествува со 0,6 отсто.

Скопската компанија „Настел“ поседува над 3.100 акции со право на глас во НЛБ Банка. Нивната пазарна вредност согласно со последната берзанска цена изнесува 2,4 милиони евра. Количината акции што ја поседува „Настел“ во вкупната сума акции на НЛБ Банка учествува со 0,37 отсто.

Како следен најголем акционер фигурира скопска „Комерцијална банка“ која има нешто повеќе од 2.800 акции во НЛБ Банка, но од банката објаснуваат дека Комерцијална банка не е сопственик на акции во НЛБ Банка АД Скопје. Станува збор за старателска/и сметка/и отворена/иво име на Комерцијална банка АД Скопје, а за сметка на нејзините клиенти за кои ја извршува функцијата Чувар на хартии од вредност/депозитарна банка, односно Чувар на имот.

За појаснување, согласно правилата за работа на ЦДХВ, „Старателска сметка е сметка за хартии од вредност на име на овластен учесник на пазарот на хартии од вредност или банка чувар на имот на пензиски и инвестициски фондови, отворена врз основа на договор за чување хартии од вредност и/или договор за чување имот на пензиски и инвестициски фондови, и на која се водат сопственичките позиции за сметка на трето лице. Сопственик на хартиите од вредност на оваа сметка никогаш не е овластениот учесник на пазарот на хартии од вредност и/или банката чувар на имот на пензиски и инвестициски фондови, туку лицето за чија сметка овластениот учесник и/или банката чувар на имот за пензиски и инвестициски фондови води грижа за хартиите од вредност (инвеститор)“.

Инаку, само да потсетиме дека убедливо најголем акционер во НЛБ Банка Скопје е словенечката „Нова Љубљанска банка“ со седиште во Љубљана, Словенија. Како доминантен сопственик таа поседува 742.804 акции со право на глас односно 87 отсто од сите акции со право на глас во таа банка. Пазарната вредност на акциите на словенечкиот акцонер во НЛБ Банка е над 555 милиони евра.

Според познавачите на состојбите и трендовите на македонскиот пазар на хартии од вредност двете скопски градежни компании го интензивирале купувањето акции во НЛБ Банка од пролетва наваму. Веројанто нивната проценка е дека вложувањето на ликвидни средства во акции на НЛБ Банка е добра и конкурентна инвестиција која ќе носи добри дивиденди, но може да носи и капитална добивка.

Повеќе детали за тоа како работи НЛБ Банка може да прочитате на овој линк https://faktor.mk/koja-e-dobitnata-kombinacija-shto-na-nlb-banka-i-donese-44-milioni-evra-profit-za-devet-meseci

Министерката за енергетика, рударство и минерални суровини, Сања Божиновска, оствари продуктивна средба со вицепремиерката и министерка за инфраструктура и енергија на Република Албанија, Белинда Балуку. Разговорите беа насочени кон продлабочување на билатералната соработка во енергетскиот сектор, со особен фокус на напредокот на проектот за интерконекторот меѓу Македонија и Албанија кој ќе овозможи енергетската поврзаност меѓу двете земји.

Проектот за интерконекторот, кој е поддржан од Европската унија и други меѓународни институции, има за цел да обезбеди енергетска стабилност и зголемена флексибилност во снабдувањето со природен гас за целиот регион. Планот предвидува интерконекторот да биде дел од пошироката регионална енергетска мрежа, која ќе го поврзе нашиот регион, овозможувајќи поголема енергетска независност и конкурентност.

Двете страни го истакнаа значењето на овој интерконектор како клучна инфраструктура за енергетска поврзаност во регионот, која е предвидена да ги поврзе македонскиот, албанскиот и грчкиот енергетски систем. Овој проект ќе овозможи засилено снабдување и диверзификација на енергетските ресурси, зголемување на енергетската стабилност и ефикасност, како и намалување на зависноста од увоз на енергенси.

Министерката Божиновска истакна дека за Македонија ова поврзување е од огромно значење. „Со реализацијата на овој интерконектор, Македонија ќе добие директен пристап до гасоводните мрежи во Албанија и Грција, што ќе ни овозможи сигурност и разновидност во снабдувањето со енергија. Ова е витално не само за енергетскиот сектор, туку и за целокупната економија на земјата,“ потенцираше министерката Божиновска.

Во рамки на разговорите, беше отворена и темата за поврзување на енергетските пазари, што претставува дел од пошироката визија за регионална соработка. Поврзувањето на пазарите има за цел да ја олесни трговијата со енергија, оптимизирајќи го користењето на ресурсите и овозможувајќи поголема транспарентност и конкурентност во енергетскиот сектор. Преку создавање на поголем заеднички пазар, ќе се овозможи поголема флексибилност, која е клучна за адаптација кон обновливите извори и намалување на фосилните горива​.

Од страна на Балуку, беше нагласена заложбата на Албанија за поддршка на регионалните иницијативи кои го олеснуваат енергетскиот транзит и ја засилуваат соработката на Балканот. Во рамките на средбата, двете министерки се договорија за следни чекори и планираат дополнителна билатерална средба со цел забрзување на реализација на проектите што се од интерес на двете земји и регионот.

Со оваа средба, двете земји покажуваат подготвеност за заеднички напредок кон интегриран и енергетски независен регион, како значаен чекор во насока на исполнување на европските цели за одржлива енергија и климатски неутрален континент.