„Страотен облик на суровост и изживување врз мирно бездомно животно во фирма во Момин Поток – куче над 20 пати зверски удирано по глава од вработен! Во друштво на четири полнолетни лица, мажи, мирно бездомно куче е удирано со дебело дрво, најкрвнички и со сета сила, без било кој да интервенира додека кучето урлика од болка и не можејќи да избега или се спаси; случај кој ќе останеше невиден доколку не беше евидентиран на камерите за видео надзор“, велат од Анима Мунди.

„Со какви психопати сме опкружени, доколку од 5 лица, ниту еден во ова ѕверство не препознава екстремна суровост, инстинктивно не се обидува да интервенира и го сопре?

Како и во секоја нормална држава бараме итно процесирање на кривична постапка и најстрога, тригодишна казна затвор за сторителот.

Три години затвор без исклучок зошто ваква омраза и суровост може да направи само девијантно и крајно опасно, садистичко битие, психопат без контрола и без грам емпатија кон послабите.

Колку за илустрација, во Англија би бил осуден на петгодишна затворска казна, а во Грција за вакво мачење се предвидува и до 10 години затвор и глоби до 15 000 евра.

Државата мора да ја препознава и најстрого казни суровоста кон животните која е во државите во ЕУ индикатор за насилство врз деца, жени, ранливи категории; показател на сериозна психопатологија.

Согласно информациите кои ги имаме овој монструм е приведен и нема да дозволиме да се извлече. Бараме јавно произнесување на Министерот за внатрешни работи, Панче Тошковски во однос на овој случај кој е шокантен и кој ќе го следиме до крај.

Анима Мунди изготви Предлог Иницијатива за измена и дополна на Кривичниот законик која ќе биде доставена во Владата, претседателот на Владата, Христијан Мицкоски и ресорните министерства наредната недела, секако и до медиумите и јавноста, за која очекуваме унифицирана поддршка од сите релевантни субјекти. Насилството врз животните е показател на сериозна психосоцијална и морална девијација и мора да се препознае како такво, превенира, казни, запре!

Благодарност за човекот кој го однел во ЈП Лајка, ветеринарите на ЈП Лајка и доктор Марин Величковски кои се борат за да се спаси ова куче, мирно и најкротко на свет.

А ние се бориме вакво нешто да не се повтори, а сторителот и таквите како него да не излезат од зад решетки“, се вели во соопштението на Анима Мунди.

Претседателката на Македонија, Гордана Силјановска Давкова, искажа топло добредојде на новоименуваната канадска амбасадорка, Мишел Камерон. Во својата изјава, Силјановска Давкова ја истакна важноста на партнерството меѓу двете земји, особено во рамките на НАТО и во процесот на реформите и евроинтеграциите на Македонија.

„Благодарност до Канада за континуираната поддршка во клучните процеси за нашата земја. Во време на глобални предизвици, соработката и солидарноста меѓу нашите народи се поважни од кога било,“ изјави Силјановска Давкова.

Таа подвлече дека соработката со Канада претставува значаен чекор за јакнење на стабилноста, демократијата и економскиот развој во Македонија, додавајќи дека овие односи се пример за силно меѓународно партнерство.

Именувањето на Мишел Камерон како нова амбасадорка се очекува да отвори нови можности за унапредување на билатералните односи и заедничките проекти меѓу двете земји.

Општина Кисела Вода продолжува да го покажува својот фокус кон социјалната инклузија, ставајќи посебен акцент на поддршката за децата со атипичен развој. Градоначалникот Орце Ѓорѓиевски објави значајни новини, меѓу кои и официјалното потпишување меморандум за соработка со Филозофскиот факултет од Скопје, предводен од деканот проф. д-р Оливер Бакрески, и Институтот за специјална едукација и рехабилитација.

„Горди сме што со оваа соработка обезбедуваме нова поддршка за родителите и нивните деца. Преку користење на целосно опремените сензорни соби, ќе им овозможиме дефектолошки, логопедски и психолошки третмани, како и стручна помош од високо квалификувани лица,“ истакна Ѓорѓиевски.

Општината, која веќе има опремено шест сензорни соби во основните училишта, во изминатиот период реализираше бројни едукативни активности, трибини и стручно-научни конгреси во соработка со релевантни институции.

„Нашата цел е да го подобриме квалитетот на живот на овие деца и да обезбедиме поддршка за нивните семејства. Продолжуваме да работиме со целосна посветеност,“ додаде тој.

Во рамките на новата соработка, студентите и кадарот од Филозофскиот факултет ќе имаат можност за стручна пракса, што дополнително ќе придонесе за развојот на оваа област.

Со ваквите активности, Кисела Вода останува пример за општествено одговорно работење и грижа за најранливите категории.