2024 година донесе значителни промени на глобалниот пазар на трудот, при што одредени индустрии забележаа исклучителен раст.

Еве кои сектори забележале најбрз раст врз основа на профитабилноста, побарувачката и долгорочните изгледи.

Е-трговија – Продажба преку мобилни и социјални мрежи

Електронската трговија сочинува повеќе од една петтина од глобалната продажба на мало, а до 2027 година се очекува тој удел да порасне на 22,7%. Малите бизниси се повеќе користат онлајн канали за нивниот бизнис да опстане и да напредува.

Истражувањата покажуваат дека 80% од малите и средни бизниси користат алатки за дигитална продажба. Алатките за оптимизација како Semrush им овозможуваат на малите бизниси да ја подобрат својата онлајн видливост и да привлечат нови клиенти. Дигитализацијата на купувањето донесе експлозивен раст во е-трговијата, со посебен фокус на мобилното купување и нарачката преку социјалните медиуми.

Онлајн трговијата, која сочинува скоро 70% од сите онлајн трансакции во 2024 година, дава можности за претприемачите кои развиваат мобилни платформи или ги оптимизираат постоечките страници за мобилни корисници. Од друга страна, трговијата со социјалните медиуми овозможува директна продажба преку платформи како што се TikTok и Instagram.

Оваа индустрија е исклучително погодна за мали бизниси, бидејќи трошоците за влез може да бидат ниски, а потенцијалниот поврат на инвестицијата висок. Успехот на ова поле зависи од креативноста, разбирањето на целните групи и способноста за брзо прилагодување на новите трендови.

Независни медицински сестри и работници за домашна нега

Растот на бројот на постари лица и зголемениот притисок врз здравствените системи создадоа плодна почва за независните здравствени работници.

Медицинските сестри, особено оние со повисоки квалификации, се повеќе избираат самовработување. Како независни изведувачи, тие можат да даваат услуги со флексибилни договори, а потребата за нив ќе достигне врв до 2025 година со недостиг од речиси 80.000 регистрирани медицински сестри во САД.

Бројот на домашни здравствени работници се очекува да порасне за речиси 21% до 2033 година. Негувателите кои пружаат помош на постарата популација, како и пациентите со попреченост или хронични заболувања, можат да сметаат на пристојни приходи.

Експерти за ментално здравје и советување

Брзите промени во општеството и намалувањето на стигмата поврзана со менталното здравје доведоа до огромно зголемување на побарувачката за професионалци за психотерапија и советување.

Луѓето сè повеќе бараат помош, а зголемената несигурност во животот на луѓето придонесува за зголемената побарувачка за професионалци за ментално здравје. Според проекциите, до 2033 година се очекува бројот на работни места во овој сектор да се зголеми за 19 проценти. Поединци со соодветно образование и лиценци можат да отворат свои ординации, обезбедувајќи услуги потребни за локалните заедници.

Исто така, договорната работа со училишта, болници и корпорации обезбедува дополнителни можности за оние кои претпочитаат пофлексибилни форми на работа. Оваа професија не само што ветува стабилност туку има и големо општествено значење.

Лични финансиски советници

Со оглед на промените во пензиските системи и подолгиот животен век, финансиските совети стануваат сè поважни. Проекциите покажуваат дека можностите за вработување на лични финансиски советници ќе се зголемат за 17% до 2033 година.

Започнувањето на приватна пракса во оваа област бара основно образование, лиценца и одредено искуство, но потенцијалот за приходи и постојаната потреба за заштеди и инвестициски совети го прават ова атрактивен избор. Советниците можат да работат независно или во партнерство со поголеми финансиски институции, пишува SEEbiz.eu.

Сајбер безбедност и вештачка интелигенција

Со порастот на сајбер нападите и ширењето на вештачката интелигенција, експертите од овие области се меѓу најбараните.

Вештачката интелигенција и технологијата се повеќе стануваат незаменлив дел од бизнисот и општеството. Компаниите ширум светот бараат експерти за вештачка интелигенција за да ги задоволат потребите на проектот и да ги пополнат празнините во вештините во нивните тимови. Оваа ситуација им дава можност на поединците да станат независни консултанти, истражувачи или инженери за вештачка интелигенција, нудејќи ги своите знаења и вештини на организациите кои сакаат да ги подобрат своите производи и процеси.

Почетна точка за влегување во светот на вештачката интелигенција може да биде диплома по компјутерски науки, инженерство или поврзана област, но неопходна е специјализација преку дополнителна обука и сертификација. Индустријата нуди различни насоки, од развој на алгоритам до примена на ВИ во здравствената, финансиската и производствената индустрија.

Работните места на научниците за податоци се очекува да пораснат за 36%, додека истражувачите од компјутерски науки ќе забележат зголемување од 26% до 2033 година. Овие податоци јасно укажуваат на континуираниот раст и потенцијал на секторот за вештачка интелигенција во наредните децении.

2024 година истакна неколку клучни области каде што малите приватни бизниси можат да напредуваат. Без разлика дали се работи за зелена енергија, здравствениот сектор, дигиталната економија или идните технологии, заедничкиот именител на овие сектори е постојано растечката побарувачка. Претприемачите кои се подготвени да инвестираат во образованието, иновациите и приспособувањето кон пазарните трендови имаат реални шанси за долгорочен успех. Без разлика на изборот на индустријата, клучот е во препознавање на потребите и одговор на нив преку експертиза и квалитет.Блиц.рс

Министерката за енергетика, рударство и минерални суровини, Сања Божиновска, оствари работна средба со ректорката на Универзитетот „Св. Кирил и Методиј“ во Скопје, проф. д-р Биљана Ангелова. На средбата беа отворени повеќе теми од заеднички интерес, со фокус на енергетската ефикасност, соработката меѓу Министерството и Универзитетот и можностите за поддршка на младите кадри, соопштија од Министерството за енергетика, рударство и минерални суровини.

Ректорката Ангелова ја истакнала важноста на енергетската стабилност за редовното функционирање на универзитетот, наведувајќи дека високите сметки за електрична енергија претставуваат значителен финансиски товар. Таа посочила дека Универзитетот бара начини за оптимизација на трошоците за електрична енергија, како и долгорочно и одржливо решение.

-Иако Македонија повеќе од година и половина успешно ја менаџира својата берза за електрична енергија, која функционира преку националниот Оператор за пазар на електрична енергија (МЕМО), повеќето државни и јавни институции, вклучувајќи ги училиштата, болниците и комуналните претпријатија, се соочуваат со сериозни предизвици. Овие институции се обврзани да купуваат електрична енергија на слободниот пазар, плаќајќи по цените што се формираат на берзата ХУПЕКС во Унгарија. Иако се работи за некомерцијални субјекти, над 200 јавни установи моментално плаќаат просечна дневна берзанска цена за струја, што значително ги оптоварува нивните буџети, се вели во соопштението.

Министерката Божиновска ја истакнала подготвеноста на Министерството да ги разгледа можностите за олеснување на оваа ситуација и потенцирала дека решавањето на овој проблем е од суштинско значење за подобрување на енергетската одржливост на јавниот сектор и за ослободување на средства кои би можеле да се инвестираат во други развојни проекти.

Министерката и ректорката разговарале и за важноста од стимулирање на студентите и создавање услови кои ќе ги мотивираат младите и перспективни кадри. Министерката Божиновска истакна дека развојот и поддршката на младите се меѓу клучните приоритети на Министерството, при што е подготвена да иницира и поддржи заеднички проекти со Универзитетот кои ќе придонесат за развој на нови таленти и обезбедување стручни кадри во енергетскиот сектор.

Министерството за енергетика, велат оттаму, останува посветено на пронаоѓање на одржливи решенија за оптимизација на енергетските ресурси и обезбедување економска стабилност за институциите и граѓаните.

Премиерот Христијан Мицкоски денеска апелираше до трговците да го преиспитаат своето однесување во однос на цените на прехранбените производи и најави дека ќе побара од Пазарниот инспекторат вонредна инспекција со цел да се утврди како цената на одредени основни производи е зголемена во изминатите 30 дена. 

– На седница на Влада ќе побарам робусна, жестока акција од Пазарниот инспекторат затоа што добивам информации дека некои од маркетите шпекулираат и се служат со трикови. Јас со трикови не функционирам и тие што мислат дека ќе функционираат со трикови, се лажат. Не може тоа што на нив им беше дадено како право и можност за едни производи, сега да го прават со драматично зголемување на некои други призводи како маслото, лебот, јајца, брашно…. Жестоко ќе се спротиставиме со оние што мислат дека не надмудриле. Срамота е ова што го прават пред празниците што доаѓаат. Сакавме да покажеме добра волја, а видете како враќаат. Ова не е коректно и денеска од страна на министерот за економија и труд ќе побарам вонредна инспекција и ова девијатно однесување да престане, рече Мицкоски по пуштањето во употреба на спортска сала во населено место Црешово во општина Гази Баба. 

Со мерката „Новогодишна кошничка“, која важи до 15 јануари, се опфатени повеќе од илјада производи. Беше направена во соработка со трговските и производителите со цел да им се излезе во пресрет на граѓаните за време на новогодишните празници. Надлежните очекуваа намалување на прехранбените производи за околу 10 проценти, но граѓаните се жалат дека не се забележува некое поголемо намалување на цените и дека се зголемени цените на основните прехранбени производи како брашното, зејтинот, јајцата… 

Во однос на 250-те милиони евра од првата трашна од унгарскиот кредит кои се наменети за бизнис секторот, Мицкоски рече дека има административни процедури што треба да се завршат и очекува во јануари овие средства да бидат оперативни.

– Во Парламентот треба да помине закон којшто не сакаме да го ставаме на брза лента, туку да помине во редовна процедура, рече Мицкоски.