Она што не успеавте да го направите на седницата за доверба на Владата денеска ви успеа – резигнирано коментираше Претседателот на Собранието Талат Џафери веднаш откако ја констатираше оставката на Премиерот Заев и целата негова Влада.
Опозицијата целиот негов коментар го проследи со бурен аплауз.
Собранието денеска на седницата за пратенички прашања ја констатира оставката на премиерот Зоран Заев. Оставката беше констатирана без премиерот Заев усно да ја образложи. Оставката на премиерот повлекува оставка и на целата Влада.
Оставката на премерската функција Заев ја поднесе вчера до претседателот на Собранието, Талат Џафери.
Во доставената оставка Заев наведе дека ваквата одлука ја презел како логичен чекор кој произлегува од исходот на локалните избори и како израз на преземената одговорност за изборните резултати.
На премиерската функција Заев беше од 31 мај 2017 година, а втор премиерски мандат освои на изборите на 15 јули минатата година.
Со констатирањето на оставката почнуваат да течат уставните рокови за избор на нова Влада.
Уставот на Република Северна Македонија и собранискиот Деловник ја регулираат постапката во случај на оставка на претседателот на Владата.
Во членот 93 од Уставот е наведено дека „Оставката на претседателот на Владата, неговата смрт или трајната спреченост да ја врши функцијата, повлекуваат оставка на Владата. Владата која поднела оставка или на која мандатот и престанал, останува на должност до изборот на нова Влада“.
Во член 219 од Деловникот на Собранието, пак, стои дека „Владата, претседателот на Владата или член на Владата можат да поднесат оставка. Оставката на Владата или на претседателот на Владата, се поднесува до претседателот на Собранието во писмена форма и може да се образложи… Оставката на Владата или на претседателот на Владата, претседателот на Собранието веднаш ја доставува до пратениците и до претседателот на Републиката“.
Во член 220 понатаму се вели дека „Собранието на првата наредна седница, без претрес, констатира дека на претседателот на Владата, на Владата или на член на Владата, мандатот им престанува на денот на одржувањето на седницата“.
Потоа, според член 90 од Уставот, претседателот на државата е должен во рок од десет дена да го довери мандатот за состав на Влада на кандидат на партијата, односно партиите што имаат мнозинство во Собранието. Мандаторот во рок од 20 дена од денот на доверувањето на мандатот, на Собранието му поднесува програма и го предлага составот на Владата.
Владата, на предлог на мандаторот и врз основа на програмата, ја избира Собранието со мнозинство гласови од вкупниот број пратеници.
По констатирањето на оставката, се очекува парламентарното мнозинство за мандатар да го предложи новиот лидер на СДСМ и актуелен заменик министер за финансии Димитар Ковачевски.
По добиениот мандат Ковачевски во првата половина на следниот месец до Собранието би требало да ги достави програмата и предлогот за состав на новиот владин кабинет, по што би уследил избор на неговата влада на собраниска седница.
Демократијата значи и одговорност. Со мојата оставка, преземам одговорност и оставам пример за граѓанската должност на идните лидери, но и давам уште еден придонес во јакнење на демократскиот капацитет на државата, наведе премиерот во оставка Зоран Заев во објава на Фејсбук, информирајќи дека денеска ја поднел оставката од функцијата до претседателот на Собранието, Талат Џафери.
„Ми беше огромна чест што можев да служам и што ја имав довербата на мнозинството од народот во изминатите четири години“, наведе Заев во објавата.
Истакнвуа дека сака да им се заблагодари на пратениците во Собранието, од овој и од претходниот состав, на членовите на двата состава на Владата за време на неговите мандати и на граѓаните.
„Посакувам благосостојба и просперитет на сите наши граѓани, на сите заедници, на целиот наш народ“, додава Заев во објавата на неговиот фејсбук-профил.
Денеска треба да биде констатирана оставката од Собранието, па во јавноста откако излезе документот на кој пишува Република Македонија, многумина велат дека Талат Џафери би можел истата да ја врати. Димитар Апасиев од Левица вчера напиша дека Џафери, ја одбил оставката на Заев, бидејќи не била двојазична.
Денеска же видиме дали Собранието ќе ја констатира оставката.
Премиерот Зоран Заев попладнево до претседателот на Собранието ја достави најавената оставка на премиерската функција.
Пратеникот од редовите на Левица на својот Фејсбук профил напиша дека претседателот на Собранието, Талат Џафери, ја одбил отавката на Заев, бидејќи не била двојазична.
„Ајдеее… Таљат не му ја прифаќа оставката на Зоти Заев, оти не била двојазична
#КаковКрајЗоране“, напиша Апасиев.
Зоран Заев ја поднесе оставката од премиерската функција. Во известувањето до Собранието и спикерот Талат Џафери, Заев напишал дека нема намера оставката усно да ја образложи.
Заев оставката ја најави веднаш по поразот во вториот круг на локалните избори, откако претходно функцијата премиер ја заложи во градоначалничката битката за Град Скопје. Откако го загуби Скопје, но и поголемиот дел општини Заев изјави дека ќе поднесе оставка која неколку пати досега ја одложуваше со образложение дека го чека датумот за преговори со ЕУ.
Откако стана извесно дека Бугарија нема да попушти и да дозволи датум за Македонија, Заев реши да ја поднесе оставката веднаш по годишното обраќање на претседателот Стево Пендаровски во Собрание.
Според документот кој го објави ТВ24, Заев го наведува тоа што го постигнал со Грција кога го смени името и државата стана членка на НАТО. Напиша дека постигнал траен мир, безбедност и економски добробит за народот.
Тој додава дека времето ќе покаже дека оваа негова одлука е во согласност со определбата за одговорност за тешки одлуки.
Наследник на Заев треба да биде новиот лидер на СДСМ, Димитар Ковачевски.
Премиерот Зоран Заев утре ќе поднесе оставка, барем така најави на денешната конференција во Тирана.
– На последниот ден од мојата должност како премиер на Македонија, ја имам честа директно да учествувам и да дадам свој придонес во оваа благородна иницијатива Отворен Балкан, рече Заев по денешната средба со српскиот претседател Александар Вучиќ и албанскиот премиер Еди Рама во Тирана како дел од регионална иницијатива „Отворен Балкан“.
Претходно претседателот на Србија, Александар Вучиќ му за заблагодари на успешната соработка претходните години.
Прво да завршат преговорите со Алтернатива, да се види како ќе одат преговорите со Бугарија, па дури тогаш премиерот Заев би ја активирал оставката. Ова тој вечерва го изјави за ТВ Телма.
„Прво треба да се завршат преговорите за парламентарното мнозинство со Алтернатива. Ако се заврши и јавно објави, ќе се направи проценка со стабилно и зголемено парламентарно мнозинство да се влезе во Парламентот со постапка за избор на влада со Алтернатива, а во зависност од преговорите со Бугарија. Една од најзначајните причини поради која Алтернатива би влегла во влада е да обезбеди стабилна влада и стабилно мнозинство поради почеток на преговорите со ЕУ“, вели Заев.
После вчерашната изјава на првиот вицепремиер Артан Груби од ДУИ, денеска и неговиот сопартиец министерот за надворешни работи Бујар Османи упати апел Заев да остане на премиерската функција , да не се загрозат евроинтегративните процеси и државата да не влезе во нови проблеми.
Од друга страна лидерот на ВМРО-ДПМНЕ Христијан Мицкоски бара од Заев, по поднесената оставка во партијата, да поднесе оставка и во Владата.
Доколку оставката биде прифатена, почнува постапка за избор на нов претседател на партијата. Според Статутот на партијата, предвиден е рок од 15 дена за распишување внатрепартиски избори за нов претседател на СДСМ. Изборите се непосредни, со тајно гласање за сите пријавени членови. Новиот претседател, како што најави самиот Заев, треба да биде и мандатар на новата влада. Во јавноста веќе кружат неофицијални имиња за иден премиер.
Дел од членството на СДСМ не ја поддржува оставката на Заев најавена по завршувањето на локалните избори, кога партијата изгуби повеќе градоначалнички места.
Вечер заседава и Централното претседателство на Алтернатива, кое треба да одлучи дали ќе ја прифати понудата на Заев, партијата да биде дел од Владата во наредниот период.
Премиерот Заев во вторник ќе го свика Централниот одбор на СДСМ за да му биде ефектуирана оставката.
Премиерот Зоран Заев по средбата со лидерот на Алтернатива, изјави дека во вторник ќе го свика Централниот одбор на СДСМ за да му биде ефектуирана оставката и со тоа да почне постапката за избор на нов претседател на партијата и мандатар на владата.
– Органите и телата на партијата ќе го кажат тоа. СДСМ нема донесено одлука. Мојот личен став од досегашното искуство и минатото во нашата држава кога еден човек бил премиер, а друг претседател на владејачка партија, е дека лидерот на партијата треба да биде и мандатар затоа што во тој случај и одговорноста и легитимитетот е комплетен, рече Заев.
Нагласи дека останува на неговата јавна објава за оставка и од функцијата претседател на Владата и лидер на партија и дека ќе ги депонира оставките до надлежните институции веднаш штом биде осигурно парламентарното мнозинство.
– Ако се гледа како се поставките по Устав, до 14 декември не се стига за изборот на нова влада и нов мандатар. Логично е СДСМ да го искористи овој период и да го избере својот претседател. Затоа ќе побарам од органите и телата на партијата да биде свикан Централниот и Извршниот одбор за да се констатира мојата оставка и веднаш да почне постапката за избор на нов претседател на партијата. Зборот е збор и ќе се радувам да дочекам ваква големина и даден збор од други политичари. Ако се успее во целиот овој период, а верувам дека може, СДСМ да има избрано претседател тој би требало да биде идниот мандатар односно да предложи нова Влада. Кога имате нов мандатар, треба да имате и нова влада, а не реконструкција на влада, нагласи Заев.
Во однос на информациите објавени во дел од медиумите дека Димитар Ковачевски ќе биде новиот лидер на СДСМ и новиот мандатар, Заев рече дека претстои процес на избор од страна на членството на СДСМ и оти партијата преку непосредни избори ќе одлучи кој ќе биде идниот лидер.
За денешното присуство на Ковачевски на состанокот со Алтернатива, Заев рече дека тој е член на Извршниот одбор на СДСМ и претседател на партиската Комисија за финансирање и буџет, како и докажан кадар кој комплетно е подготвен да помогне во денешните разговори.
Лидерот на Алтернатива Африм Гаши прашан колку за неговата партија е прифатливо да има нов мандатар и комплетно нова влада, рече дека не сака да се меша во внатрешните работи на партијата и оти очекува идниот наследник на Заев да го продолжи континуитетот на разговорите.
Раководството на ВМРО-БНД после слабите резултати од изборите на 14 ноември во Бугарија си поднесува оставка.
-Благодарам за поддршката на вистинските бугарски патриоти, кои ја одбра ВМРО. Ви благодариме за поддршката во тешката политичка, економска и здравствена криза.
По анализата на изборните резултати, раководството на ВМРО во име на извршниот комитет одлучи да поднесе оставака и да свика организациониот совет за подготовки и свикување на КОнгрес на ВМРО-БНД. Задачата на овој Кoнгрес ќе биде да одлучи за иднината на организацијата и да избере ново раководство. Остануваме верни ба бугарската национална кауза. Ги повикуваме бугарските политички партии, застапени во Народното Собрание да не отстапуват од заштитата на националните интереси во Македонија. Кауза која ќе продолжиме да ја браниме по било која цена. Да живее Бугарија, Бугарија пред се, се вели во соопштението објавено на официјалната Фејсбук страница на ВМРО-БНД.
