Политиката не беше иницијална каписла, но како тргна, веројатно ќе премине од суета во политички пазар, рече денеска д-р Сашко Јовев, разрешениот директор на Клиниката за кардиохирургија, пишува СДК.мк.

Министерот за здравство Фатмир Меџити вчера го разреши реномираниот кардиохирург од раководната функција откако, како што кажа, инспекторите од Државниот здравствен и санитарен инспекторат (ДЗСИ) утврдиле нерегуларности во работата на Клиниката.

Д-р Јовев денеска беше пречекан со аплауз и овации од колегите и од пациенти, кои вознемирени раскажуваа како ги примал, оперирал и негувал докторот.

-Очекував ваква поддршка, јас си го знам тимот. Ова е тим кој работи 24/7, кој нема работно време. Јас во моето 35-годишно искуство немам земено ден боледување. Минатата недела морав да земам поради притисоци. Неодамна отворивме хибридна сала на Клиниката, на која дојде премиерот. Министерот не дојде, дали сметаше дека е доцна пратена поканата, но имав притисоци зошто сме ја отвориле без него, рече кардиохирургот, додавајќи дека не е партиски кадар, и дека има целосна поддршка од заменик-министерката за здравство Маја Манолева.

Адвокатот на д-р Јовев, Мите Михајловски, кажа дека во решението за разрешување е наведено оти д-р Јовев двапати дежурал во 2022 без согласност од министерот, а тогаш беше Беким Сали на таа функција.Д-р Јовев кажа дека е нормално да се дежура и да се покриваат колеги, како што работат сите клиники.

Михајловски најави правна процедура за решението за разрешување.

-Во оваа држава само успехот не се простува, рече д-р Јовев.

Кардиохирургот Сашко Јовев лани беше меѓу добитниците на државната награда „Св. Климент Охридски“, највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес во држвата. Преходно ја доби наградата за животно дело „Гемиџиите“ на Општина Велес, а беше и дел од тмиот наградени со „13 Ноември“ на Град Скопје. Првата трансплантација на срце беше изведена на 23 мај 2020, оттогаш има изведено вкупно осум пресадувања на срце.

Светската здравствена организација (СЗО) соопшти дека очекуваниот животен век на оние кои престануваат да пушат во своите 30-ти се зголемува за околу десет години во споредба со оние кои продолжуваат да пушат, а циркулацијата се подобрува за период од две до 12 недели.

Од првиот ден на откажување од пушење, високиот пулс, крвниот притисок, нивото на јаглерод моноксид се враќаат во нормала и со текот на времето се зајакнува имунолошкиот систем. Во периодот од две до 12 недели по откажувањето од пушењето, се подобрува циркулацијата во телото и се зголемува капацитетот на белите дробови.

Пушењето претставува најголем поединечен фактор на ризик за здравјето и еден од најважните јавно-здравствени предизвици во светот во моментов. Според податоците на Светската здравствена организација, пушењето е поврзано со 7,2 милиони смртни случаи годишно во светот, што е повеќе од вкупниот број на смртни случаи од ХИВ/СИДА, маларија и туберкулоза.

По повод 31 мај, Светскиот ден без тутун, се наведува дека повеќе од 80 отсто од 1,3 милијарди корисници на тутунски производи во светот живеат во земји со низок и среден приход. Околу половина од оние кои користат тутунски производи умираат порано од очекуваното од болести поврзани со тутунот.

Од повеќе од осум милиони луѓе кои годишно умираат поради употреба на тутун, приближно 1,3 милиони се оние кои се изложени на чад од тутун иако не го користат.

Околу 700 милиони деца се погодени од чад од тутун. Секоја година, 65.000 деца умираат пред да наполнат пет години од инфекции на респираторниот тракт предизвикани од пасивна изложеност.

Тутунската индустрија се обидува да ја задржи зависноста од тутун нудејќи различни производи како што се електронски цигари, наргиле, овошни вкусови, топчиња од ментол, како и тутунски производи како што се цигари, луле и пури. СЗО потенцира дека сите овие производи го загрозуваат здравјето.

Отпушоците кои и штетат на животната средина се најчестиот отпад во светот. Хемикалиите и отпадот од електронските цигари во догорчињата истекуваат во водата и почвата и ѝ штетат на животната средина.

Тутунската индустрија е виновна што годишно се сечат околу 600 милиони дрвја за производство на цигари.

Ослободувањето од оваа зависност обезбедува многу здравствени, социјални, економски и еколошки придобивки.

Бебе вчера починало во стомакот на родилка од Битола откако ѝ била дадена таблета да го испровоцира породувањето, ама родилката била пратена дома од лекарот гинеколог кој бил дента на смена.

Кога родилката се вратила ноќта на болница да раѓа веќе било доцна, дежурните лекари виделе дека бебето страда, по бојата и исцедокот на водењакот, се обиделе да ја породат родилката и да го реанимираат бебето, но му немало спас, дознава „Независен“ од болнички извори.

Директорот на битолската клиничка болница д-р Александар Обедниковски, во порака го потврдува случајот за „Независен“ , но не дава детали, туку само кажа дека денеска во 14 часот министерот за здравство д-р Фатмир Меџити доаѓа во посета на болницата.

Од Битолското обвинителство за „Независен“ го потврдуваат случајот и велат „во тек е обдукција да се утврдат причините за смртта. Чекаме известување, па во зависност од наодот ќе знаеме дали предметот ќе се префрли кај нас“.

Утрово лекарите од Гинекологија биле на состанок со директорот, кој пак им предочил дека ситуација е особено чувствителна, дотолку повеќе по смртта на малата Јана Христовска (6), која пред речиси 20 дена почина на Детското одделение откако прими инфузија и по смртта на 12-годишно момче од битолското село Лера.