На Германија ѝ недостасува речиси секој профил на квалификувани работници.

Им требаат од возачи на автобуси и камиони, до градинари и ѕидари, месари и келнери, пишува германската новинска агенција (ДПА).

На пример, 44 отсто од сите возачи на автобуски и железнички јавен превоз имаат најмалку 55 години. Меѓу сите вработени во Германија, секој четврти има над 55 години. Уделот на постарите работници од 27 отсто е нешто над просекот во здравството, пренесува Феникс магазин.

Сиљановска-Давкова: Нашите ракометари покажаа борбеност и дух на вистински шампиони

Претседателката на Република Македонија, Гордана Сиљановска-Давкова, упати честитки до македонската ракометна репрезентација поради значајното реми на отворањето на Светското првенство во ракомет.

„Горда сум, а верувам дека сте и вие, на нашите ракометари кои покажаа нескротлива борбеност и нескршлив дух. Светското првенство го започнавме како вистинска ракометна сила, докажувајќи дека сме рамноправен противник на најдобрите,“ истакна Сиљановска-Давкова.

Таа нагласи дека ракометарите уште еднаш потврдиле дека во спортот нема мали и големи држави, туку дека победничките адути се спортската стаменост, посветеноста, решителноста и храброста.

Претседателката упати благодарност до македонската публика која, со своето страстно навивање, на ракометарите им дала „вулканска енергија“ за постигнување на успехот.

„Верувам во нивната сила и им посакувам витешка игра во следните натпревари. Моите мисли и емоции се со нив,“ порача Сиљановска-Давкова, изразувајќи надеж дека тимот ќе продолжи со одлични резултати и понатаму.

Претседателката Гордана Сиљановска-Давкова денеска остварила средба со специјалниот претставник на Кралството Норвешка за Западен Балкан, Еирик Матисен.

Двајцата соговорници го поздравиле сојузништво во НАТО а претседателката изразила благодарност за норвешката континуирана поддршка на македонските евроинтеграциски процеси.

Сиљановска Давкова на средбата уште еднаш истакнала дека географски, историски и културно, отсекогаш сме биле дел од Европа и дека на нашето пристапување кон Унијата гледа како на реинтеграција.

Претседателката на средбата потенцирала дека како држава Македонија сторила многу, па дури и го смени државното и уставно име, и укажала на неопходноста од почитување на волјата на граѓаните, како и на политичкото достоинство. 

Претседателката, исто така, упатила на одредбите од договорот за ЕУ, Лисабонскиот договор, Повелбата за фундаменталните права, како и другите релевантни документи со кои се гарантираат националниот и културниот идентитет, како и еднаквоста на државите, се вели во соопштението од претседателскиот кабинет.

Потенцирајќи дека нашиот Устав гарантира сеопфатна заштита на малцинските права, претседателката Сиљановска-Давкова ја квалификува билатерализацијата на процесот на пристапување кон Европската Унија како опасен преседан, што нема да остане осамен.

На средбата претседателката ја изразила својата лична заинтересираност за норвешката литература, филозофија и уметност. За неа норвешката демократија е инспиративен политички систем, се вели во соопштението. 

Оттука таа го нагласила задоволството што двете држави повеќе од три децении негуваат одлични билатерални односи, како и очекувањето дека соработката континуирано ќе се зајакнува и унапредува во сите сфери од заемен интерес, а особено во економската област, рефлектирајќи ги потенцијалите на двете држави.

Специјалниот претставник Матисен на средбата истакнал дека и покрај тоа што Норвешка не е членка на ЕУ, целосно ги разбира македонските позиции. 

Тој дополнително подвлекол дека, денес, кога постојано се соочуваме со нови предизвици, посветеноста на принципите на меѓународното право и мултилатерализмот е поважно од кога било, стои во соопштението.