Градоначалникот на општина Кисела Вода, Орце Ѓорѓиевски, најави изградба на амфитеатар во подрачното училиште „Кузман Јосифовски – Питу“ во населбата Црниче, како дел од заложбите за подобрување на условите за образование. Новата летна училница, со површина од околу 150 м², ќе биде модерен простор за изведување на настава на отворено, како и за организирање на културни и образовни активности кои ќе ја поттикнат креативноста и љубопитноста кај младите.

„Посветени сме секое училиште во нашата општина да добие современи и функционални простори, со што создаваме подобра иднина за нашите деца,“ изјави Ѓорѓиевски.

Покрај изградбата на амфитеатарот, во централното училиште „Кузман Јосифовски – Питу“ е во тек реконструкција на трпезаријата, а од следната недела ќе започне молерисување на повеќе од 2000 м² училници и ходници. Овие зафати значително ќе го подобрат изгледот и функционалноста на училиштето.

Градоначалникот Ѓорѓиевски потврди дека инвестицијата во образованието останува приоритет, со планови за реконструкција и уредување на сите образовни институции во општината, нагласувајќи дека ова е инвестиција во иднината на општината и државата.