Кривичниот суд соопшти дека до крајот на неделата ќе биде донесена оценката за обвинителниот акт поврзан со трагичниот пожар во дискотеката „Пулс“ во Кочани.
„Судот целосно го разбира и почитува јавниот интерес за овој предмет, поради што досега повеќепати ја информираше јавноста за текот на постапката и преземените чекори“, наведуваат од институцијата.
Обвинението опфаќа 37 правни и физички лица, застапувани од 33 адвокати и претставници. Од моментот на приемот, судот вложил напори за неговата достава и разгледување на приговорите. Процесот, сепак, бил забавен бидејќи дел од адвокатите и правните претставници подолг период биле недостапни во нивните канцеларии.
Откако обвинителниот акт е уредно доставен до сите обвинети и нивните бранители, на 3 октомври истекуваат законските рокови за приговори.
„Со тоа се исполнети сите услови за оцена и очекуваме актот да биде разгледан до крајот на неделата. Јавноста и странките ќе бидат навремено известени“, велат од судот.
Оттаму нагласуваат дека прават максимални напори за да се испочитуваат законските рокови и да се гарантираат правата на странките, со цел понатамошната постапка да не биде компромитирана.
