Албанскиот премиер Еди Рама повторно го привлече вниманието на регионалната јавност со своите иронични и саркастични забелешки упатени кон Грција и Црна Гора, овој пат за време на панел-дискусија во рамките на самитот што се одржа во Обединетите Арапски Емирати.
Говорејќи за односот на Грција кон соседите, Рама изјави дека дел од грчката елита често ги потценува другите народи, сметајќи дека има историски и културен монопол врз филозофијата и цивилизацијата. Во таа насока, тој нагласи дека иако Грција се повикува на Платон и Аристотел, тоа не ѝ дава право да се поставува над останатите во регионот.
Посебно внимание предизвика неговата изјава за Црна Гора, која ја нарече „најголемата и најмоќната земја во регионот со 50 милиони жители“, очигледно користејќи иронија за да ја истакне апсурдноста на одредени регионални наративи. Овие зборови беа изнесени додека на панелот се дискутираше за улогата и влијанието на балканските држави.
Сличен настап Рама имаше и на панел во рамките на Берлинскиот процес во Лондон кон крајот на октомври минатата година, каде што учествуваше и црногорскиот премиер Милојко Спајиќ. Тогаш, додека Спајиќ зборуваше за историјата и независноста на Црна Гора, Рама неколкупати го прекинуваше со иронични забелешки, вклучително и тврдења дека Црна Гора е „постара од Грција и Србија“.
Настапите на албанскиот премиер беа различно протолкувани во јавноста – дел од коментаторите сметаат дека станува збор за шеги и дипломатска иронија, додека други ги оценуваат како потсмев кој создава непотребни тензии меѓу лидерите и државите во регионот.
