Највисоки претставници на 27-те земји членки на Европската Унија се состануваат денеска во Брисел на итен вонреден состанок, откако американскиот претседател Доналд Трамп најави воведување нови царини за увоз од осум европски земји како резултат на контроверзиите околу спорот за Гренланд.
Состанокот, свикан на амбасадорско ниво и инициран од Кипар, кој го претседава со Советот на ЕУ, има цел да ги разгледа последиците од најавените мерки на САД и да подготви заеднички одговор на ескалацијата во трговските и геополитички односи.
Трамп порача дека од 1 февруари ќе воведе дополнителни 10 % царини за увоз од Данска, Норвешка, Шведска, Франција, Германија, Обединетото Кралство, Холандија и Финска, а тие може да се зголемат на 25 % од јуни ако Европа не попушти на неговите барања за договор околу купопродажба на Гренланд.
Гренланд, кој е автономен регион во состав на Данска, се најде во центарот на оваа криза откако Трамп повторно го изнесе интересот на САД за стекнување со островот под претекст на обезбедување на стратешка безбедност во Арктикот, што предизвика остри реакции и незадоволство од европските лидери.
Европските дипломати нагласуваат дека ваквите закани со царини може да подкопаат трансатлантските односи и да доведат до посериозни последици за трговските договори меѓу САД и ЕУ, кои ионака беа на „чекање“ поради најавите за нови тарифи.
Овој вонреден состанок претставува значаен тест за единството на ЕУ во време на зголемени трговски и безбедносни напнатости меѓу Европа и Соединетите Американски Држави.
