Истражувањата за организираниот криминал во Европа сè почесто го насочуваат вниманието кон Балканот, каде што делуваат моќни и добро вмрежени криминални структури. Според „Глобалниот индекс на организиран криминал“, Европа е втор најбезбеден континент, но одделни земји и натаму се издвојуваат по влијанието на мафијата. Во таа слика, Турција е на врвот, а Црна Гора се најде на шестото место според присуството на организиран криминал.
Хрватскиот портал „Индекс“, повикувајќи се на транскрипти од апликацијата Скај, објави детали за контактите на балканските кланови со добавувачи на дрога од Венецуела. Во пораките се споменува набавка на три тона кокаин од лице означено со псевдонимот „Покровител“, за кое истражните досиеја наведуваат дека е еден од најмоќните наркобосови на Балканот. Одлуките за ваквите пратки, според истите извори, биле носени под надзор на Радој Звицер, осудениот водач на Кавачкиот клан од Црна Гора.
Случајот „Венецуела“ од 2020 година дополнително ја осветли оваа мрежа. Тогаш холандските власти уапсија 11 црногорски државјани во Аруба, при што на бродот „Ареса“ беа пронајдени пет тони кокаин. Членовите на екипажот беа осудени на затворски казни од девет до 15 години.
Меѓународните истраги укажуваат дека балканските криминални групи често се третираат како дел од поширок „Балкански картел“, составен од мрежи од Црна Гора, Србија, Албанија, Хрватска, БиХ и Словенија. Како пример се наведува и поранешниот полицаец од Лозница, Мирослав Старчевиќ, идентификуван како водач на група што користела Сиера Леоне како логистички центар за кокаин, поврзана со Кавачкиот клан.
Според меѓународните извештаи, Венецуела е клучна транзитна точка за кокаинот што пристигнува во Европа од Јужна Америка. Анализите посочуваат дека Балканскиот картел располага со широка мрежа во над 30 земји, со строга хиерархија и значајна оперативна моќ, а фигурата позната како „Покровител“ се смета за еден од неговите највлијателни лидери.
