Во сенка на зголемената американска воена присутност и сè погласните закани од Вашингтон, израелскиот премиер Бенјамин Нетанјаху во четврток свика итни безбедносни консултации во Ерусалим. Темата, официјално, остана „класифицирана“. Неофицијално – погледите се вперени кон Иран и можниот американски удар што би можел драматично да ја промени регионалната рамнотежа.
Според информации на израелскиот Канал 12, средбата била фокусирана на сценаријата што би следеле доколку претседателот на САД, Доналд Трамп, ја реализира својата закана за воена акција против Техеран. Заканите не се нови, но овојпат се проследени со конкретни потези: распоредување на, како што самиот Трамп ја нарече, „масовна армада“ американски сили во Блискиот Исток.
Иран најави демонстрација на својата поморска моќ веќе следната недела и отворено предупреди дека евентуален напад ќе биде дочекан со одмазда – не само врз американски цели, туку и врз Израел. Иранските власти се под дополнителен притисок поради крвавото задушување на антирежимските протести, за кои организациите за човекови права известуваат за илјадници, а можеби и десетици илјади жртви.
Трамп, пак, јавно го поврза можниот напад и со нуклеарната програма на Иран, барајќи договор што би ја запрел амбицијата на Техеран за развој на нуклеарно оружје. Според висок американски функционер, цитиран од Канал 12, одлука за напад би можела да следи „во наредните денови“, откако сите американски воени капацитети ќе бидат целосно распоредени во регионот.
Во израелските безбедносни кругови не постои уверување дека дури и силен, но ограничен американски напад би довел до пад на иранскиот режим. Таа проценка, според медиумите, ја дели и самиот Трамп. Наместо тоа, евентуалната операција би била насочена кон конкретни цели – нуклеарни објекти и ракетни капацитети.
Но во Ерусалим постои сериозна загриженост: дури и ограничен удар би можел да предизвика жесток ирански одговор врз Израел. Во такво сценарио, израелскиот одговор би бил „енергичен и решителен“, велат извори блиски до безбедносниот естаблишмент.
Американскиот министер за одбрана Пит Хегсет во четврток порача дека Пентагон е подготвен да ја спроведе секоја одлука на претседателот. „Иран не смее да се стреми кон нуклеарни капацитети. Ќе испорачаме сè што овој претседател го очекува од Министерството за војна“, изјави Хегсет, користејќи го терминот што администрацијата на Трамп неофицијално го наметна за Министерството за одбрана.
Додека реториката се заострува, во Вашингтон тивко се води интензивна дипломатска и разузнавачка активност. Според „Аксиос“, високи израелски и саудиски одбранбени и разузнавачки претставници се во американската престолнина на разговори со администрацијата на Трамп.
Израел, меѓу другото, споделува конкретни разузнавачки податоци за потенцијални цели во Иран. Шефот на воената разузнавачка дирекција на ИДФ, генерал-мајор Шломи Биндер, веќе одржал средби со претставници на Пентагон, ЦИА и Белата куќа, носејќи информации што директно ги побарале САД.
Саудиска Арабија, пак, се обидува да игра улога на посредник. Министерот за одбрана Халид бин Салман требаше да се сретне со државниот секретар Марко Рубио и специјалниот пратеник на Трамп, Стив Виткоф. Истовремено, саудискиот престолонаследник Мохамед бин Салман му порача на иранскиот претседател Масуд Пезешкијан дека Ријад нема да дозволи неговиот воздушен простор или територија да бидат искористени за напад врз Иран.
