По две години апсолутна доминација, Tesla Model Y ја загуби круната на најпродаван автомобил во Кина. 2025 година донесе изненадувачки пресврт: на врвот се искачи мал, достапен електричен хечбек кој целосно ја редефинираше логиката на кинескиот пазар.
Нов лидер е Geely Galaxy Xingyuan, модел долг само 4,13 метри, кој со импресивни 465.775 продадени возила ја освои титулата најпродаван автомобил во земјата. Со едноставен, но модерен дизајн, солидно опремен ентериер и цена од околу 8.500 евра, Xingyuan директно им конкурира на урбаните електрични фаворити како BYD Dolphin и Wuling Bing, но очигледно – и успешно ги надминува.
Веднаш зад него се најде уште еден симбол на кинеската електрична револуција – Wuling Hongguang Mini EV, со 435.599 продадени примероци, потврдувајќи дека евтините и компактни електрични автомобили се срцето на домашниот пазар.
Некогашниот број еден, Tesla Model Y, мораше да се задоволи со третата позиција и 425.337 испорачани возила, што јасно укажува на зголемениот притисок од домашните производители. Во меѓувреме, титулата за најпродаван бензински автомобил и натаму ја брани Nissan Sylphy, кој останува редок светол пример за странски бренд во врвот.
Интересно е и движењето кај новите модели: Xiaomi SU7 направи силен влез и ја заврши годината на осмото место, оставајќи го зад себе Tesla Model 3, кој падна на 11-та позиција – уште еден знак дека технолошките кинески компании сериозно навлегуваат во авто-индустријата.
На ниво на производители, кинеските брендови ја зацврстуваат контролата врз домашниот пазар. BYD испорача 3,48 милиони возила, Geely 2,61 милиони, а заедно држат околу 65% од пазарниот удел, додека странските производители бележат континуиран пад.
