Министерот за надворешни работи и надворешна трговија, Тимчо Муцунски, отпатува денес во Обединетите Арапски Емирати, каде ќе ја претставува Македонија на Светскиот самит за влади во Дубаи. Настанот, кој годинава се одржува под мотото „Обликување на идните влади“, привлекува импресивна меѓународна публика: над 35 шефови на држави, 20 лидери на глобални организации и повеќе од 500 министри од различни земји.
Главниот фокус на Муцунски на самитот ќе биде глобалната трговија и логистика, а неговото обраќање на панел-дискусијата посветена на новите промени во логистичкиот поредок се очекува да ги истакне приоритетите на Македонија во овие клучни области.
Во рамките на посетата, се планира и потпишување значаен Меморандум за разбирање меѓу владите на Македонија и ОАЕ, како и низа билатерални средби со претставници на мултинационални компании. Од Министерството за надворешни работи нагласуваат дека учеството на високо ниво на овој престижен самит ја потврдува посветеноста на македонската дипломатија кон продлабочување на соработката со арапскиот свет и клучните меѓународни партнери.
