Уличката што води покрај објектот на ЈП „Македонска пошта“, веднаш под железничката станица, се наоѓа во очајна состојба. Коловозот е расечен со дупки и оштетувања, кои секојдневно создаваат проблеми за возила и пешаци. И покрај интензивната употреба на улицата, досега нема никаква официјална интервенција за сервисирање или асфалтирање.
Жителите на Скопје реагираат на социјалните мрежи, нагласувајќи дека проблемот не е во некоја периферија, туку во срцето на градот. Една граѓанка е директна во својот апел: „Не е во Кушкундалево, во центар е! Дупката е пред портите на поштата, а они гледаат само плата. Ако некој од властите не забележува, еве јас како граѓанка што плаќа даноци – повикувам да се постави нов асфалт, зашто во штикли лесно можеш да паднеш.“
Друг граѓанин потенцира дека опасноста не е само за пешаците. „Ги има повеќе дупки. Син ми искина гума на колата. Кога гумата се скрши, се купува нова, ама проблемот со улицата останува“, додава тој.
Граѓаните бараат итна реакција од надлежните институции, нагласувајќи дека улицата треба да стане безбедна за секого – пешаци и возила.
