Доставата на онлајн-пратки кон македонските граѓани забави поради новите законски обврски за пресметка на данокот на додадена вредност (ДДВ), информира националната „Пошта на Македонија“. Според соопштението на поштенската институција, секоја пратка нарачана од странство сега мора да мине низ царински преглед, што создава застој во обработката.
Причината е измената на Законот за ДДВ, која стапи на сила на 18 декември минатата година. Досега пратките со вредност до 22 евра беа ослободени од ДДВ, но сега таа поволност е укината. „Пошта на Македонија“ заедно со Царинската управа активно бараат начини за забрзување на царинските формалности, со цел пратките да пристигнуваат до примачите што е можно побрзо.
Министерството за финансии ја потенцира економската добивка од оваа промена. Пренасочувањето на речиси 4 милиони денари месечно од увозот кон домашното стопанство ќе ја поддржи локалната економија, ќе овозможи раст на домашните компании и создавање нови работни места, како и подобрување на условите за работа и платите на вработените.
„Новите правила ќе го намалат ризикот од злоупотреби кои досега овозможуваа увоз на стоки ослободени од ДДВ, кои потоа се продаваа на домашниот пазар“, соопшти Министерството. Целта е фер и контролирана пазарна средина која ќе ја намали сивата економија.
Според Агенцијата за пошти, во земјата се регистрирани 29 поштенски компании. Од нив, „Пошта на РМ“ поседува индивидуална дозвола за обезбедување универзална услуга, додека останатите работат под општо овластување.
