Во текот на последните два дена, полицијата спроведе низа акциски контроли во сообраќајот низ Источна Македонија, при што беа откриени повеќе прекршоци од страна на млади возачи.
Во Делчево, рано утрово, на улицата „8 Септември“, полициски службеници од ОВР Делчево го лишија од слобода А.Б. (25) од село Вирче. При редовна контрола, тој бил затекнат зад воланот на патничко возило „БМВ“ со делчевски регистарски ознаки, и тоа без претходно положен возачки испит. Возилото било одземено, а против А.Б. ќе следи соодветна пријава.
Ден порано, во Кочани, полициски службеници од ОВР Кочани го уапсија 28-годишниот К.Д. од Кочани, кој исто така управувал возило без да има возачка дозвола. Возилото „Фолксваген Голф“ со кочански регистарски ознаки било одземено, а против К.Д. ќе биде поднесена соодветна пријава по целосното документирање на случајот.
Истата вечер, на магистралниот пат Делчево – Кочани, кај Виничка крстосница, полициски службеници од ОВР Виница го приведоа И.В. (25) од Виница. Тој бил затекнат како управува „Фолксваген Голф“ со регистарски ознаки од Македонска Каменица, и тоа додека имал активна забрана за управување со моторно возило од Б категорија и бил под дејство на алкохол, со измерени 1,14 промили во крвта. Возилото му било одземено, а против него ќе следува пријава.
