Министерот за дигитална трансформација, Стефан Андоновски, престојува во Барселона, Шпанија, каде учествува на Mobile World Congress (MWC26) – најголемиот глобален настан во областа на мобилните комуникации и дигиталните технологии.
Настанот ги обединува креаторите на политики, претставници на телекомуникациската индустрија и водечки компании од областа на мобилните уреди и дигиталните решенија, со цел размена на идеи и креирање на идните насоки за дигитален развој.
Во рамки на посетата, Андоновски активно лобира за имплементација на принципот „роаминг како дома“, кој предвидува намалување на трошоците за користење мобилни услуги во странство и нивно усогласување со европските стандарди.
Тој учествуваше и на GSMA Ministerial Programme, каде се дискутираше за клучни теми како што се поврзливоста, развојот на дигиталната инфраструктура, сајбер безбедноста и идните мрежни технологии.
„Ова е најголемиот светски настан во оваа област, каде заедно со владини претставници и приватниот сектор разговараме за прашања од значење за граѓаните. Проектот ‘Роаминг како дома’ останува наш приоритет, со цел граѓаните да имаат пониски цени за мобилни услуги, СМС и интернет во Европската Унија“, изјави Андоновски.
Тој додаде дека постои значителна поддршка од меѓународните партнери и разбирање од телекомуникациските оператори за реализација на оваа иницијатива.
Во текот на посетата, министерот остварил средби со претставници на мобилни оператори кои работат во Македонија, како и со водечки светски компании од областа на технологијата, каде се разговарало за инвестиции во дата центри, развој на вештачка интелигенција, зајакнување на сајбер безбедноста и унапредување на дигиталната трансформација.
