Министерството за енергетика, рударство и минерални суровини објави јавен оглас за практична реализација на Програмата за заштита на ранливи потрошувачи на енергија. Целта е обезбедување инвертер клима уреди за домаќинствата на кои поддршката им е најпотребна, како конкретна мерка против енергетската сиромаштија.
Компаниите кои вршат трговија со високоефикасни инвертер клима уреди можат да се пријават за учество, а правото го имаат сите правни субјекти регистрирани во Централниот регистар.
За граѓаните се обезбедуваат ваучери до 28.000 денари за набавка и инсталација на клими со најмалку енергетска класа А+, со вклучена монтажа и гаранција од минимум две години, без дополнителни трошоци.
По завршување на јавниот оглас, ќе бидат објавени компаниите кај кои ќе може да се набавуваат уредите и листата на корисници што стекнале право на субвенција, по што веднаш започнува процесот на набавка и инсталација.
Министерката Сања Божиновска истакнува дека ова е директна поддршка за граѓаните и инвестиција во достоинствен живот и пониски сметки.
…
