Адвокатот Тони Менкиноски објави дека официјалните власти во Софија, Република Бугарија, донеле одлука со која му се изрекува забрана за влез во државата во траење од 10 години.
Тој за утре најави прес-конференција на која ќе ги изнесе деталите за случајот, оценувајќи дека станува збор за „скандалозна одлука“ и директен притисок врз неговата работа.
-Станува збор за директен напад врз мојата адвокатска дејност и обид за замолчување на мене, како правен застапник на Македонците во Бугарија пред Европскиот суд за човекови права во Стразбур – наведува Менкиноски во поканата до медиумите.
Тој најави дека на прес-конференцијата ќе ги образложи можните причини за оваа одлука, како и последиците што, според него, произлегуваат од повредата на човековото право на слободно движење и вршење на адвокатската професија во земјата каде што живеат Македонци чии предмети ги застапува.
Прес-конференцијата ќе се одржи утре, на 7 март, со почеток во 11:30 часот во неговата адвокатска канцеларија на булевар „ВМРО“ 7/31 во Скопје.
Менкиноски ги повика медиумите да присуствуваат, нагласувајќи дека, како што вели, јавноста треба да биде информирана за „меѓународниот правен преседан и притисоците со кои се соочуваат бранителите на човековите права“.
