Европа би можела да се соочи со сериозен енергетски удар доколку продолжи со политиката на постепено откажување од рускиот природен гас, предупредува Кирил Дмитриев, специјален претставник на рускиот претседател за инвестиции и економска соработка и директор на Рускиот фонд за директни инвестиции (RDIF).
Во објава на социјалната мрежа Икс, Дмитриев оцени дека континентот се движи кон „енергетско цунами“. Тој реагираше на коментар на друг корисник во кој се тврди дека европските лидери се соочуваат со сериозни предизвици, од економска стагнација до слаб воен капацитет, додавајќи дека ситуацијата може да стане уште потешка од очекуваниот енергетски шок.
Според него, прекинот на снабдувањето со руски гас може да доведе до период на масовни банкроти и длабока енергетска криза во Европа. Дмитриев смета дека ваквиот курс бил силно поддржан од раководството на Европската унија, посочувајќи ги претседателката на Европската комисија Урсула фон дер Лајен и шефицата на европската дипломатија Каја Калас.
Во меѓувреме, Европската унија веќе постави јасен временски рок за прекин на зависноста од рускиот гас. Советот на ЕУ кон крајот на јануари усвои мерки со кои увозот на руски течен природен гас треба целосно да запре од 1 јануари 2027 година, додека испораките преку гасоводи ќе бидат прекинати до 30 септември истата година.
Дел од ограничувањата ќе стапат на сила и порано. Така, краткорочните договори за течен природен гас ќе престанат да важат од 25 април 2026 година, а договорите за испорака преку гасоводи ќе треба да бидат затворени најдоцна до 17 јуни 2026 година.
Русија, пак, навестува дека можеби нема ни да го чека тој рок. На 4 март претседателот Владимир Путин изјави дека Москва би можела сама да го забрза излегувањето од европскиот енергетски пазар и да ги насочи своите ресурси кон други партнери кои покажуваат поголем интерес за руските енергетски извори.
