Црна Гора е на прагот да направи нов чекор кон Европската унија, со очекувањето денеска да го затвори преговарачкото поглавје за трансевропските транспортни мрежи. Со ова, бројот на успешно завршени поглавја ќе се искачи на 14 од вкупно 33.
Земјата ги започна преговорите за членство во 2012 година, а властите сега најавуваат дека останатите поглавја би можеле да бидат завршени до крајот на годинава, со цел Црна Гора да стане полноправна членка на ЕУ во 2028 година. И покрај оваа амбициозна цел, рокот е оптимистички поставен, иако и од Брисел и од јавноста доаѓа силна поддршка, околу 70% од граѓаните се за полноправно членство.
Декември беше месец на значителен напредок. Црна Гора успеа да затвори пет поглавја, но најголем предизвик остана земјоделскиот сектор, каде Франција првично имаше забелешки. По директни разговори меѓу претседателите Јаков Милатовиќ и Емануел Макрон, Париз конечно даде зелено светло. На почетокот на 2026 година беше затворено уште едно поглавје, со што бројката се искачи на 13.
Меѓутоа, патот кон ЕУ не минува без турбуленции. Новите закони за внатрешни работи и за Агенцијата за национална безбедност предизвикаа загриженост во Брисел, бидејќи не се целосно усогласени со европските стандарди. Политичката криза беше неизбежна, опозицијата ја напушти парламентарната работа, а претседателот Милатовиќ одби да ги потпише законите и ги врати на повторно разгледување. Владејачкото мнозинство, сепак, најави дека ќе ги усвои повторно, што ќе го принуди претседателот да стави потпис.
