Европската Унија станува сè повеќе глобален магнет, дури и за земји од други континенти, и тоа поттикна необична дискусија за можноста Канада некогаш да се приклучи на блокот. Оваа идеја ја лансираше францускиот министер за надворешни работи, Жан-Ноел Баро, кој на конференцијата Европа 2026 во Берлин го спомена трансатлантскиот сојузник како пример за растечката привлечност на ЕУ.
Баро нагласи дека Европската Унија, со својата економска моќ, демократскиот модел и регулаторната способност, сè повеќе привлекува земји надвор од своите граници. „Денес, девет земји се официјални кандидати за членство, но други би можеле да се приклучат – Исланд наскоро, а некогаш во иднина и Канада“, рече тој, додавајќи дека ова не е конкретен предлог, туку илустрација на глобалниот замав на Унијата.
Идејата за канадско членство доби поттик и од затегнатите односи со Соединетите Американски Држави, особено за време на мандатот на Доналд Трамп, кој во минатото шеговито сугерираше дека Канада би можела да стане „51-та американска држава“. Дури и ако на почетокот овие изјави беа примани со насмевка, во Отава реакцијата постепено стануваше сериозна. Според анкета од 2025 година, 44 проценти од Канаѓаните сметаат дека нивната земја би требало да размисли за приклучување кон ЕУ.
Покрај Баро, и финскиот претседател Александар Стаб го поддржа сличниот предлог, спомнувајќи го дури и во разговори со канадскиот премиер Марк Карни. Меѓутоа, официјалните позиции јасно ја исклучуваат оваа можност. Портпаролката на претседателката на Европската комисија, Урсула фон дер Лајен, ја поздрави анкетацијата, но ја отфрли идејата како нефункционална. Од канадска страна, премиерот Карни нагласи дека земјата нема намера да се приклучи на Унијата.
Иако полноправното членство на Канада во ЕУ останува малку веројатно, Отава се стреми кон засилени врски со Унијата. Новиот стратешки партнерски договор за одбрана и безбедност, како и продлабочување на соработката во трговијата и синџирите на снабдување, покажуваат дека блиските односи со Европа се приоритет.
