Фотографија: Стојанче Јовановски
На 30 март во Кривичен Суд во Скопје ќе започне судскиот процес против Стојанче Јовановски, кој се товари за повеќе кривични дела поврзани со трагичната смрт на неговата сопруга Ивана Јовановска и нивната шестгодишна ќерка Катја.
Обвинителството против Јовановски поднесе обвинение за телесна повреда, продолжено семејно насилство, загрозување на сигурноста и наведување на самоубиство. Според најавите, ова ќе биде прво рочиште во случај што ја вознемири јавноста поради тежината на настаните.
Во обвинителниот акт се наведува дека на 2 март обвинетиот во повеќе наврати физички ја нападнал сопругата на различни локации во Скопје, нанесувајќи ѝ удари по телото и главата, при што таа во еден момент ја изгубила свеста. Подоцна ѝ упатил и сериозни закани по нејзиниот живот, со што, според обвинителството, создал чувство на страв и несигурност кај жртвата.
Оттаму додаваат дека насилството траело подолг временски период, при што жената била изложена на континуиран психички и физички притисок и се наоѓала во состојба на зависност од обвинетиот.
На кобниот ден, по нов бран насилство и закани, таа се вратила во станот со намера да ги земе личните работи и да го напушти домот. Сепак, според обвинението, состојбата во која се наоѓала кулминирала со трагичен исход – таа паднала од терасата на станот на шестиот кат заедно со детето.
Јавниот обвинител предложил продолжување на мерката притвор за обвинетиот, поради опасност од бегство и можност да го повтори делото. Судот допрва ќе одлучува за овој предлог, додека Јовановски засега останува во притвор.
Случајот предизвика силни реакции во јавноста и повторно го отвори прашањето за институционалната заштита од семејно насилство.
