Собранието денеска ќе ја одржи 94. седница, на која клучна точка на дневниот ред е изборот на нов државен јавен обвинител. Предлогот на Владата е на оваа функција да биде избран Ненад Савески, актуелен судија во Основниот кривичен суд – Скопје.
Савески беше номиниран на 10 март, а за да ја добие довербата на парламентот потребно е да обезбеди најмалку 61 глас од пратениците. Неговата кандидатура доаѓа по оставката на досегашниот обвинител Љупчо Коцевски, по спроведена постапка во која учествуваа вкупно пет кандидати.
Роден во 1976 година, Савески е магистер по казнено право и своето образование го стекнал на Правниот факултет „Јустинијан Први“ при УКИМ во Скопје. Правосудниот испит го положил во 2003 година, а од 2016 година е судија во одделот за организиран криминал и корупција при Основниот кривичен суд. Претходно работел како јавен обвинител и стручен соработник во правосудните институции.
Во својата кариера бил ангажиран и како експерт во повеќе меѓународни организации и проекти, меѓу кои ОБСЕ, Советот на Европа и УСАИД, како и во рамки на Националната конвенција за ЕУ. Учествувал во работни групи за судски реформи и бил вклучен во проекти поврзани со кривичната постапка и истражните мерки.
Покрај тоа, Савески има и академски ангажман како предавач во Академијата за судии и јавни обвинители, како и обучувач во областа на човековите права и кривичното право. Автор е и коавтор на повеќе стручни трудови и публикации.
На истата седница, пратениците ќе разгледуваат и избор на член на Судскиот совет, како и предлог-закони од областа на пензиското осигурување и инфраструктурните проекти, вклучително и делниците од коридорите 8 и 10-д.
Дополнително, на дневен ред може да се најде и предлогот Ацо Ристов да биде избран за претседател на Регулаторната комисија за енергетика, по оставката на досегашниот претседател Марко Бислимоски.
