Исламската револуционерна гарда (ИРГК) соопшти дека го привела пилотот на соборениот американски борбен авион F-15 Eagle, по спроведена операција за пребарување на терен, пренесуваат ирански медиуми.
Според новинската агенција Nour News, повикувајќи се на неофицијални извештаи, командосите на копнените сили на ИРГК извршиле обемна операција во областа каде што се урнал авионот и успеале да го лоцираат и приведат американскиот пилот.
Во информациите се наведува и дека претходно била објавена снимка од пилотското седиште на авионот на профил поврзан со разузнавачките структури на ИРГК, наводно со цел да се попречи евентуална спасувачка мисија на американските сили.
Претходно, агенцијата Tasnim News Agency објави дека американската војска не успеала да го евакуира пилотот. Според истите извори, во обидот за спасување биле вклучени хеликоптери UH-60 Black Hawk и транспортен авион C-130 Hercules.
Иранските медиуми претходно информираа дека еден или повеќе пилоти се катапултирале над југозападниот дел на земјата, при што локалното население било повикано да помогне во нивното пронаоѓање, со понудена награда.
Информациите засега доаѓаат исклучиво од ирански извори, додека официјална потврда од американска страна сè уште нема.
