Владата подготвува нов пакет мерки за справување со растот на цените, најави премиерот Христијан Мицкоски, посочувајќи дека економските притисоци, меѓу другото поттикнати и од случувањата на Блискиот Исток, внимателно се следат и анализираат.
Според него, пред било каква конкретна интервенција, државните институции ќе извршат детална анализа на состојбите на пазарот, по што ќе бидат предложени таргетирани решенија.
„Во овој момент очекувам извештај, кој ќе го разгледаме темелно во наредните денови. Дури потоа ќе излеземе со мерки, кои овојпат ќе бидат прецизно насочени“, изјави Мицкоски, најавувајќи пофокусиран пристап во однос на досегашните политики.
Премиерот истовремено се осврна и на цените на горивата, оценувајќи дека тие треба да бидат пониски од актуелните нивоа. Како што наведе, државните пресметки покажуваат дека литар бензин од 95 и 98 октани би требало да се движи околу 82 до 84 денари, додека дизелот би се задржал на приближно 95,5 денари.
Дополнителен фактор кој, според најавите, може да влијае на намалување на малопродажните цени се очекуваните попусти од ОКТА: два денари по литар за бензин и три денари за дизел, што, како што беше истакнато, би можело да ги позиционира горивата меѓу најевтините во регионот.
Мицкоски потсети дека Владата веќе интервенирала преку намалување на ДДВ за одредени производи и порача дека вакви чекори ќе продолжат доколку анализите покажат потреба од дополнителна реакција. На директно прашање за нови мерки, премиерот кратко одговори потврдно.
