Во текот на ноќта беше спроведена акција за демонтажа и отстранување на нелегално поставените импровизирани тезги на еден од главните влезови во Старата скопска чаршија. Со интервенцијата, просторот што со години беше окупиран од привремени штандови е целосно расчистен.
Станува збор за дел од чаршијата каде подолг период се продаваа сувенири, бижутерија и магнети наменети за туристи, поставени во импровизирани конструкции кои често го стеснуваа преминот и го отежнуваа движењето на пешаците.
Граѓани и посетители со време реагираа дека ваквиот начин на користење на јавниот простор не само што го нарушува визуелниот впечаток на една од најпосетуваните градски локации, туку и создава чувство на неред и пренатрупаност на самиот влез во чаршијата.
