Научниците можеби се на чекор до голем пробив во третманот на ќелавоста, откако развиле едноставен гел базиран на шеќер кој во рани лабораториски тестирања покажал изненадувачки силен ефект врз растот на косата.
Истражувањето се фокусирало на деоксирибоза – природен шеќер кој се наоѓа во ДНК. Првично, научниците го проучувале неговото влијание врз зараснување на рани, но при експериментите забележале неочекуван ефект: брз и значителен раст на нова коса.
Во контролирани лабораториски услови, гелот покажал дури 90% успешност кај машки глувци со хормонски предизвикана ќелавост, стимулирајќи раст на густа и здрава влакна. Резултатите биле споредливи со ефектот на Minoxidil – еден од најпознатите и ретки одобрени третмани за губење на коса.
Според научниците, механизмот на делување се базира на подобрување на циркулацијата на крвта кон фоликулите на косата. На тој начин, „заспаните“ корени повторно се активираат, а се поттикнува и создавање на нови крвни садови, што е клучно за раст на косата.
Овој пристап може да претставува побезбедна алтернатива на постојните терапии како Finasteride, кои често имаат несакани ефекти и не се погодни за сите пациенти. Дополнително, гелот е биоразградлив и нетоксичен, што го прави потенцијално попривлечен за широка употреба.
Сепак, експертите предупредуваат дека иако резултатите се охрабрувачки, истражувањето сè уште е во рана фаза. Следниот чекор се тестирања кај луѓе, кои ќе покажат дали истиот ефект може да се постигне и надвор од лабораториски услови.
Доколку се потврди ефикасноста, овој едноставен гел би можел да стане една од најголемите иновации во борбата против андрогената алопеција – проблем што засега милиони луѓе ширум светот.
