Министерството за здравство Азир Алиу, најавува законски измени со кои здравствените работници со долгогодишно искуство ќе добијат можност подолго да останат активно ангажирани во системот, како дел од напорите за задржување на стручниот кадар и валоризација на знаењето во здравството.
Обраќајќи се на свеченоста по повод 80-годишниот јубилеј на Сојузот на здруженија на пензионери на Македонија, Алиу истакна дека предложените измени во Законот за здравствена заштита предвидуваат флексибилен пристап кон продолжување на работниот век во здравствениот сектор.
Според најавите, здравствени работници на возраст од 64 до 67 години ќе можат да останат на работа доколку за тоа постои потреба во установите, додека лекарите специјалисти кои ја надминале 67-тата година ќе имаат можност да продолжат со ангажман до навршување 70 години.
Алиу нагласи дека целта на овие измени е да се признае и искористи акумулираното искуство на медицинскиот кадар, кое, како што рече, претставува значаен ресурс за здравствениот систем.
Во своето обраќање, тој посебно се осврна и на политиките насочени кон повозрасната популација, оценувајќи дека односот кон пензионерите го отсликува степенот на хуманост и зрелост на едно општество. Министерството, додаде тој, ја поставува грижата за постарите граѓани како еден од приоритетите.
Како дел од мерките за подобрување на пристапот до здравствени услуги, Алиу потсети дека веќе се обезбедува бесплатно болничко лекување за пензионери, како и ослободување од партиципација за оние со пониски примања, со што се намалува нивниот финансиски товар.
Јубилејот од осум децении постоење на пензионерските здруженија, според него, претставува потврда за долга традиција на солидарност, посветеност и грижа за генерациите кои го граделе општеството.
…
