Пентагон во доверлив извештај доставен до американскиот Конгрес проценува дека операцијата за расчистување на Ормускиот теснец од мини би можела да се протегне и до половина година, а нејзиното започнување, според воените проценки, најверојатно ќе зависи од исходот на тековните тензии меѓу САД и Иран.
Според информации што ги пренеле неколку извори запознаени со затворената седница на Комитетот за вооружени сили во Претставничкиот дом, високи претставници на Пентагон предупредиле дека ситуацијата во еден од најважните светски поморски коридори останува крајно чувствителна. Ормуската Теснина, преку која минува околу една петтина од глобалниот извоз на нафта, се смета за потенцијално жариште со сериозни последици за светските енергетски текови.
Американските проценки наведуваат дека иранските сили можеби распоредиле најмалку дваесет морски мини во клучниот регион. Дел од нив, како што се наведува, биле активирани на далечина со користење сателитска навигација, додека други биле поставувани од помали пловила, што дополнително ја отежнува нивната детекција и отстранување.
Иако Пентагон и Централната команда на САД засега не излегуваат со официјален коментар за овие информации, во воените кругови се разгледуваат различни сценарија за евентуална деминирација, меѓу кои употреба на специјализирани хеликоптери, беспилотни системи и подводни единици за специјални операции.
Вашингтон смета дека продолжена блокада или закана во теснецот би можела значително да ги зголеми цените на нафтата и да предизвика долготрајни потреси на глобалниот пазар на енергенси, со ефекти кои би се чувствувале со месеци, па дури и подолго.
Во меѓувреме, дипломатската размена меѓу двете земји останува во застој. САД инсистираат Иран да ја сопре нуклеарната програма и да овозможи целосна транспарентност околу збогатениот ураниум, како и слободен поморски сообраќај низ теснецот. Техеран, пак, одбива да се врати на преговарачка маса додека, како што тврди, не бидат укинати ограничувањата на неговите поморски активности.
Аналитичари и поранешни американски функционери предупредуваат дека секое долготрајно присуство на мини во регионот би можело дополнително да ја дестабилизира енергетската безбедност на глобално ниво и да го одржи пазарот на нафта под постојан притисок.
…
